23 февраль – 1 март кунлари Ўзбекистон Республикаси товар-хом ашё биржасида 455 та энг яхши танлов ва тендерлар ўтказилиб, битимлар амалга оширилди. “Дарё” мухбири ҳужжатларни мониторинг қилиш давомида бир қатор шубҳали ҳолатларни аниқлади. Қуйида энг эътиборга молик савдолар ҳақида маълумот беради.
Беллашувми, келишув?
Шу йилнинг 21-28 февраль кунлари Иштихон туман тиббиёт бирлашмаси аутсорсинг асосида беморларга парҳез таом етказиб бериш бўйича бошланғич қиймати 2,6 миллиард сўмлик учта тендер ўтказди. Барча танловда иккита — “Идеал Аутсорсинг” масъулияти чекланган жамияти ҳамда “Саховатли Темур” хусусий корхонаси иштирок этган.
Харид комиссиясининг якуний хулосасига кўра, “Идеал Аутсорсинг” МЧЖ мутлақ ғолиб деб топилган.
Эътиборли жиҳати, МЧЖ 2022-2025 йиллар давомида тиббиёт бирлашмаси томонидан ўтказилган 12 та танлов ғолиби бўлган. Шундан олтитасида ягона рақиб сифатида - “Саховатли Темур” хусусий корхонаси қатнашган.
Асосий фаолияти кўприклар ва туннеллар қуришдан иборат корхонанинг доимий рақобатчи сифатида иштирок этиши, таомнома тақдим қилиниши ва бошқа мезонлар бўйича харид комиссияси томонидан юқори баҳоланиши шубҳали, албатта.
“Ён қўшни — жон қўшни”
“Ўзбекистон темир йўллари” АЖга қарашли “14-сон рельс пайвандлаш поезди” МЧЖ МСР-6301А Но34 русумли стационар рельс пайвандлаш машинасини модернизация қилиш (ўрта таъмирлаш) ва эҳтиёт қисмларини етказиб бериш хизмати бўйича тендер ўтказган. Бошланғич қиймати 5,3 миллиард сўмлик танловда “Техносвар”, “РТК МАРКИН” ва “Magnumтеч” МЧЖлар ғолиблик учун курашган. Якунда “Техносвар” корхонаси 4,6 миллиард сўм билан тендерни ютиб олган.
Эътиборлиси, икки иштирокчи “Техносвар” ва “Magnumтеч” МЧЖлар Бектемир туманининг “Олтинтопган” маҳалласи, Олтинтопган кўчаси, 2 ва 2А-уйларда жойлашган.
Яна қўшнилар
Зарбдор тумани 2-сонли заиф эшитувчи болалар учун ихтисослаштирилган мактаб-интернати ўтказган тендерни 1,044 миллиард сўмлик тендер ўтказди. Унда “Food Supply” ва “Деверс Строй-ДС” МЧЖлар ғолиблик учун курашган. Якунда биринчи иштирокчи 1,042 миллиард сўмлик шартнома суммаси билан тендерни ютиб олган.
Ғолиб тадбиркорлик субъекти Зарбдор тумани, Бўстон шаҳарчаси, “Шодлик” маҳалласи, Гулзор кўчаси, 1-уйда жойлашган.
Балки тасодифдир, аммо захира ғолиб ҳам айнан шу манзилда, фақат рақамсиз уйда жойлашган. Бундан ташқари, корхона яшаш учун мўлжалланмаган биноларни қуриш билан шуғулланади. Бу ерда қонун бузилиш ҳолати мавжуд бўлиши мумкин.
Ишламаётган корхонани баҳолаб бўладими?
“Деҳқонобод калий заводи” акциядорлик жамияти 2025 йил ишлаб чиқариш эҳтиёжи учун юк автотранспорт воситаларида юк ташиш учун бошланғич қиймати 32,4 миллиард сўмлик тендер ўтказди. Энг яхши таклифни танлаб олиш бўйича ўтказилган савдо 2025 йилнинг 21 январидан 11 февралигача давом этган. Баённома 28 февраль куни расмийлаштирилган.
Энг паст нарх усули тарзида ўтказилган тендерда “Ботир техник” МЧЖ томонидан бошланғич нархдан салкам 1,2 миллиард сўм, паст нарх – 30,8 миллиард сўм таклиф қилинган ва ғолиб бўлган.
Қизиқ жиҳати, харид комиссияси аъзолари танлов иштирокчиларидан бири - амалда фаолият кўрсатмаётган “Хоразм мирзо Бобур” МЧЖ тақдим қилган ҳужжатларни баҳолаган.
“Эски дўстла-а-а-р...”
Хоразм вилояти Гурлан тумани 43-сонли айрим фанлар чуқур ўрганиладиган ихтисослаштирилган мактаб-интернати ўтказган тендерларда эса “Тайёрлов” ва “Ориент СНАБ” МЧЖлар рақобатлашган. Бошланғич қиймати 359 миллион сўм бўлган танловларда “Тайёрлов” МЧЖ ғолиб бўлган. Эндиликда мазкур корхона 8 ой давомида тўрт маҳал иссиқ озиқ-овқат билан таъминлаши зарур.
Иштирокчиларнинг маълумотларини кўздан кечириш давомида уларнинг таъсисчилари ўртасида боғлиқлик борлиги аниқланди.
Ғолиб “Тайёрлов” МЧЖнинг таъсисчи ва раҳбари Раҳимов Улфат Акбарович ҳисобланади. Захира ғолиби “Ориент СНАБ” эса Худойберганов Зокиржон Ҳакимовичга тегишли. Хўш, буларнинг қандай боғлиқлиги бор?
_page-0001-xKSEI0LG.jpg)
Биринчидан, иккиси ҳам Шовот туманида жойлашган. Иккинчидан, Улфат Раҳимов ва Зокиржон Худойберганов узоқ йиллик ҳамкорлар бўлиб, 2022 йилда тугатилган “Ганжа Урганч тайёрлов” МЧЖнинг таъсисчилари ҳисобланишади. Бундан кўриниб турибдики, танловда собиқ ҳамкорлар ўзаро беллашган.
Ғалабами, мағлубият?!
Бешариқ туман тиббиёт бирлашмаси бошланғич қиймати 305 миллион сўмлик буюмлар ёки хоналарни стерилизация қилиш хизмати учун тендер ўтказди. Унда яқинда давлат рўйхатидан ўтган “Осиё дармон” МЧЖ ва ихтиёрий тугатиш жараёнида бўлган “Ясин О” МЧЖ беллашди ва якунда “Осиё Дармон” тендерни ютиб олди.
Хўш, шунга нима бўпти, демоқчимисиз? Ҳамма гап шундаки, бу танловда ғолиб чиққан ҳам, мағлуб ҳам “Хошимов Равшанжон Аминжонович” бўладилар. Яъни, ҳар икки корхонанинг якка эгаси — шу киши. Ўз-ўзини мағлуб этиб, “Давлат харидлари тўғрисида”ги қонунни бузганларга ҳам чора кўрилишига ишонамиз.
4 кунлик “суперкорхона”
Дўстлик туман ободонлаштириш бошқармаси 17-25 февраль кунлари балон ва аккумуляторлар сотиб олиш бўйича тендер ўтказди. Унинг бошланғич қиймати 108 миллион сўмни ташкил этган. Ғолиблик учун “Смарт бизнес 222” ҳамда “Авто Service Office” МЧЖ курашган.
Якунда ташкил этилганига 4 кун ҳам бўлмаган “Смарт бизнес 222” масъулияти чекланган жамияти ғолиб деб топилиб, бошланғич қиймат баҳосида шартнома тузиш имкониятини қўлга киритган.
Бундан ташқари, ушбу корхона 26 февраль куни Дўстлик туман Ахборот кутубхона маркази ҳамда 1 март куни Ободонлаштириш бошқармаси ўтказган тендерларда ҳам ғолиб деб топилган.
_page-0001-EGOw03LY.jpg)
“Тухумдан энди чиққан” бу корхонага қаердан шунча ишонч билдирилаётгани сиз каби бизни ҳам шубҳалантирди. Яна шуниси ҳам борки, расмийлаштирилган баённомаларда харид комиссияси аъзолари белгиланган талабларга зид равишда, янги ташкил этилган МЧЖга яққол ён босганлигига гувоҳ бўлдик.
Масъуллардан ушбу шубҳали тендерлар натижаларига эътибор қаратиб, ноқонуний ҳолатлар бўйича тегишли чоралар кўришни сўраймиз.
Харидларни кузатишда давом этамиз.
Изоҳ (0)