“Деҳқонобод калий заводи” акциядорлик жамияти харид комиссияси аъзолари тендер ўтказишда қонун талабларининг қўпол равишда бузилишига йўл қўйди. “Дарё” мухбири харид маълумотлари билан танишиш жараёнида “Давлат харидлари тўғрисида”ги қонун талаблари бузилганига эътибор қаратди.
“Деҳқонобод калий заводи” акциядорлик жамияти 2025 йилда ишлаб чиқариш эҳтиёжи учун сиқилган газда ҳаракатланувчи автотранспорт воситаларида юк ташиш учун бошланғич қиймати 10 миллиард 862 миллион сўмлик тендер ўтказди. Энг яхши таклифни танлаб олиш бўйича ўтказилган савдо 2024 йилнинг 18 декабридан 2025 йилнинг 8 январигача давом этди.
Лотни ютиш учун фақат битта Тошкент шаҳрида рўйхатдан ўтган “Ромитантранс” масъулияти чекланган жамияти иштирок этган.
Энг паст нарх усули тарзида ўтказилган тендерда “Ромитантранс” томонидан бошланғич нархдан салкам 10 миллион сўм паст нарх - 10 миллиард 852 миллион сўм таклиф қилинган.
Расмийлаштирилган баённомага кўра, етти нафардан иборат комиссия аъзоларининг розилиги билан ягона иштирокчи ҳисобланган “Ромитантранс” МЧЖ лотни ютиб олган. Комиссия аъзоларининг бир нафари овоз бермаган, яна бир нафари эса бетарафлигини билдирган.
Комиссия раиси ҳисобланган жамиятнинг Молия ва иқтисод бўйича бошқарув раиси ўринбосари Уйғун Исаев эса “Давлат харидлари тўғрисида”ги қонун талабларига мос келмаслигини билдириб, қарши овоз берган. Шундай бўлса-да, аъзоларнинг ярмидан кўпи розилик билдиргани боис баённома шакллантириб, ғолиб аниқланган.
“Давлат харидлари тўғрисида”ги қонуннинг 68-моддасига мувофиқ тендерда битта иштирокчи иштирок этганлиги боис харид комиссияси тендерни ўтказилмаган деб топиши, айни ўша шартларда ўша мезонларга ва талабларга мувофиқ такроран амалга ошириши шарт эди.
Афсуски, комиссия аъзолари томонидан тендерни бекор қилиш ўрнига қонунга зид ҳаракат қилиниб, овозлар берилган.
Комиссия аъзолари қонунчиликдан бехабарми?
Уларнинг иштирокчи билан қандайдир алоқаси борми?
Масъуллардан ушбу шубҳали тендер натижасига эътибор қаратиб, ноқонуний ҳолатлар бўйича тегишли чоралар кўришни сўраймиз.
Аввалроқ, “Халқ банки” Сурхондарё вилояти Бойсун, Узун, Музработ ва Олтинсой туманларида жойлашган банк биноларини таъмирлаш бўйича тендерлар ўтказгани, уларда ака-укаларга тегишли қурилиш компаниялари рақобатлашгани ҳақида хабар берилган эди.
Изоҳ (0)