АҚШ расмийларининг фикрича, Эрон ва “Ҳизбуллоҳ” Исроилга зарба беришга дастлаб кутилганидан кечроқ қарор қилган ва ҳужумни 8 ёки 9 август куни амалга ошириши мумкин. Бу ҳақда Al Arabiya телеканали АҚШ разведкасидан хабардор манбаларга таяниб хабар берди.
Эрон ва “Ҳизбуллоҳ”нинг жавоби моҳиятан ноаниқ бўлиб қолса-да, АҚШ расмийлари ҳужум яқин эканлигига ишонч билдирмоқда. Дастлабки баҳолашлар буни ҳафта бошида башорат қилган эди, бироқ сўнгги разведка маълумотларига кўра, жавоб пайшанба ёки жума оқшомига қолдирилган бўлиши мумкин, дейилади хабарда.
Разведка маълумотларига кўра, Эрон биринчи навбатда ҲАМАС сиёсий бюроси раҳбари Исмоил Ҳаниянинг ўлдирилиши муносабати билан 7 август куни Теҳрон чақирган Ислом ҳамкорлик ташкилотининг фавқулодда йиғилишининг якунини кутади.
Аввалроқ Америка расмийларининг номи ошкор этилмаган вакили телеканалга берган интервьюсида Вашингтон Эрон ва “Ҳизбуллоҳ”нинг жавоб ҳаракатлари доирасида Сурия ва Ироқдаги АҚШ кучларига ҳужум қилишни кутаётганини айтганди. Axios портали АҚШ давлат котиби Энтони Блинкен G7 мамлакатларидаги ҳамкасбларини 5 август куни Эрон ва “Ҳизбуллоҳ” томонидан Исроилга ҳужум бошлаши мумкинлиги ҳақида огоҳлантиргани ҳақида хабар берган.
Ўтган ҳафта Теҳронда Ҳания ва Байрутда “Ҳизбуллоҳ” қўмондони Фуад Шукр ўлдирилганидан кейин Яқин Шарқдаги вазият янада кескинлашди. Эрон ва “Ҳизбуллоҳ” Исроилдан уларнинг ўлими учун қасос олишга ваъда берган.
The New York Times ўз манбаларига таяниб, Эрон олий раҳнамоси Оятуллоҳ Али Хоманаий Ҳаниянинг ўлдирилишига жавобан Исроилга тўғридан тўғри ҳужум қилишга буйруқ бергани ҳақида хабар берган.
Изоҳ (0)