АҚШ президенти Жо Байден Россиянинг музлатилган активларини Украина фойдасига қисман мусодара қилиш ғоясини қўллаб-қувватлади. Бу ҳақда 10 январь куни Bloomberg хабар берди. АҚШ Миллий Хавфсизлик кенгашининг Сенат Ташқи алоқалар қўмитасига юборилган ноябрь ойидаги ҳисоботида кўрсатилишича, Россия ҳужумидан кейин музлатиб қўйилган тахминан 300 миллиард долларлик маблағнинг бир қисми Украинанинг тикланиши учун ишлатилиши мумкин.
Ушбу қонунчилик нормаси “ижро этувчи ҳокимиятга Россия суверен активларини Украина фойдасига мусодара қилиш учун зарур бўлган ваколатларни беради”, дейилади Bloomberg журналистлари томонидан кўриб чиқилган ҳужжатда.
Байден Россия активларини мусодара қилиш ғоясини Конгрессда Украинага ёрдам блокланганидан сўнг қўллаб-қувватлади
Кейинчалик таъкидланишича, Байден Конгрессдаги республикачилар Украина қарши ҳужуми билан боғлиқ муаммолар фонида Қўшма Штатларга жуда катта молиявий юк бўлишидан хавотирланиб, Киевга кейинги ёрдам учун 60 миллиард доллар миқдорида маблағ ажратилишини тўсиб қўйгач, Россия активлари мусодара қилинишини қўллаб-қувватлади.
Агентликка кўра, Оқ уй бу шубҳаларни бошқа хавотирлар билан мувозанатлашга ҳаракат қилмоқда — Россия активлари мусодара қилиниши АҚШ молия тизими обрўсига салбий таъсир кўрсатиши ва доллардан қочишга сабаб бўлиши мумкин. Бундан ташқари, Вашингтон бу қадамни G7 бўйича иттифоқчилар билан, хусусан, европаликлар билан мувофиқлаштириш ниятида, чунки Россия музлатилган активлари умумий миқдорининг тахминан 200 миллиард доллари Европа Иттифоқи мамлакатларида жойлашган.
Ғарб Россиянинг музлатилган активларини Украинага ўтказиш йўлларини қидирмоқда
Европа ва Америка Россиянинг Украинага кенг кўламли ҳужуми ҳамда ғарбдаги Россия активлари музлатиб қўйилганидан сўнг бу маблағларни Украина фойдасига мусодара қилиш йўлларини қидирмоқда, ушбу ҳолат халқаро ҳуқуққа зид келмайди. 2023 йил ёзида Европа Иттифоқи ишчи гуруҳи Россия активларини мусодара қилишнинг қонуний йўли йўқ, деган хулосага келди. Шундан сўнг, ЕИ олинган фойдани Украинани қайта тиклашга ўтказиш учун музлатилган маблағларни қайта инвестиция қилиш имкониятларини ўрганишга эътибор қаратди.
Изоҳ (0)