“Дарё” нашри 2 мартда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Пекин Россияга ҳарбий ёрдам берса АҚШ Хитойга санкциялар киритади
Пекин Москвага ҳарбий ёрдам берса, АҚШ ҳукумати ўз иттифоқчилари билан Хитойга қарши санкциялар қўллашга тайёр. Бу ҳақда Reuters хабар беради.
Манбаларга кўра, Қўшма Штатлар Хитойга нисбатан эҳтимолий чекловларни мувофиқлаштириш учун G7 аъзоларидан ёрдам сўрамоқчи.
Ҳозирда Иттифоқчилар ўртасидаги музокаралар дастлабки босқичда эканлиги сабаб айнан қандай чекловлар кўриб чиқилаётгани ҳали номаълум.
Ушбу вазиятни аниқроқ тушуниш ва атрофлича таҳлил қилиш учун, АҚШнинг Хитойга санкциялар киритишига олиб келаётган, сабабларни кўриб чиқсак бўлади.
Бундан аввал АҚШ санкцияларига тушган Хитойнинг Spacety Cо компанияси Украинадаги “Вагнер” гуруҳига сунъий йўлдошдан олинган суратларни узатганликда айбланди.
Февраль ойида АҚШ давлат котиби Энтони Блинкен Хитой Россияга ноҳарбий ёрдам кўрсатаётганини ва қурол етказиб бериш масаласини ҳам кўриб чиқаётганини айтди.
Ўша пайтда, Хитой Украинадаги урушга айнан Америка қурол-яроғлари сабаб бўлаётганини айтиб, АҚШни айблади.
The Guardian нашри эса Хитой россияпараст дезинформациялар ва Украинадаги уруш ҳақидаги хабарлар учун глобал миқёсда ишлаб, ҳатто Москвадан кўра кўпроқ пул сарфлашини ёзди.
Унинг “урушни НАТО бошлагани ҳақидаги" такрор тезислари сабаб айрим давлатлар маълум позицияни эгаллаш четда турсин, Украинага ҳужум босқинчилик эканини тан олмайди.
Украинадан кейинги мўлжал...
Молдова бош вазири Дорин Речан Россиянинг Молдовага бостириб кириши эҳтимолдан йироқ экани, чунки у икки фронтда кураша олмаслиги ва бунинг учун ресурслари етмаслигини таъкидлади.
Речаннинг айтишича, Россия Молдовага ҳужум қила олмайди, чунки уларнинг ораси жуда узоқ, мамлакатларни Украина ажратиб туради.
“Россия эскалация учун етарли ресурсларга эга эмас. Бундан ташқари, Россия Федерацияси Молдовага ҳарбий йўл билан бора олмаслиги ҳам аниқ. Днестрбўйи минтақаси эса биз каби тинчлик ва барқарорликка интилади”, — деди Молдова бош вазири.
Молдова ҳозирда асосан Украинанинг ҳаво ҳужумидан мудофаа тизимлари билан ҳимояланган.
Бунгача Молдова разведкаси Россия 2023 йил бошида мамлакатга қарши уруш бошлашни режалагани, аммо сценарийни амалга ошириш Украинадаги вазиятига боғлиқлигини маълум қилган.
Россия ташқи ишлар вазири Сергей Лавров эса бунга жавобан Ғарб давлатлари Молдовани “навбатдаги Украина” сифатида кўраётганини даъво қилди.
Россия гази ва электр энергиясига қарамликдан қутулишга ҳаракат қилаётган давлат
Айни пайтда Молдова давлати Россия гази ва электр энергияси қарамлигидан чиқиш учун ҳаракатларни бошлаган.
2023 йил февраль ойи охирида Инфратузилма ва минтақавий ривожланиш вазири Андрей Спину Молдова Россиядан газга қарамликни тўхтатганини эълон қилди. “Тарихда биринчи марта мамлакатимиз ўнг қирғоғи ъГазпромъ томонидан етказиб бериладиган газни истеъмол қилмайди. Ўтган йилдан бери захираларни яратамиз ва бир манбага қарамликни тўхтатиш учун муқобилларни топамиз, деб ваъда бериб келдик. Биз бунга эришдик”, — дейди вазир.
Ҳозирда ҳукумат “яшил энергияга ўтиш бўйича ўзининг амбицияли режа”сини тайёрламоқда
Ўқитувчилар ва мажбурий меҳнат. Ўзбекистонда бу масалада янги қонун кучга кирмоқда. Тафсилотлар билан танишамиз
Эндиликда Ўзбекистонда ўқитувчиларни қайта мажбурий меҳнатга жалб қилганлар жиноий жавобгарликка тортилади.
Сенатнинг навбатдаги мажлисида бу борада Жиноят кодексига ҳамда Маъмурий жавобгарлик тўғрисидаги кодексга қўшимча ва ўзгартишлар киритиш ҳақида”ги қонун қизғин муҳокама қилинди.
Ҳозиргача педагогларни касбий фаолияти билан боғлиқ бўлмаган тадбирларга ноқонуний жалб этиш, педагог ходимлар ҳудудлардаги ижтимоий-иқтисодий муаммоларни ҳал этиш гуруҳларига асоссиз киритилиши, улардан турли ҳисобот ва маълумотлар талаб этиш ҳолатлари давом этмоқда.
Янги қонунга кўра, таълим ташкилотининг педагог ходимини меҳнатга маъмурий тарзда қайта мажбурлаганлик учун базавий ҳисоблаш миқдорининг 150 бараваридан 200 бараваригача (60 миллион сўм) миқдорда жарима ёки 3 йилгача муайян ҳуқуқдан маҳрум қилиш ёхуд 3 йилгача ахлоқ тузатиш ишлари билан жазолаш белгиланади.
Бундан ташқари, педагогнинг таълим олувчилар билимини тўғри ва холис баҳолашига таъсир кўрсатиш ёки қонунга хилоф равишда аралашиш, таълим ташкилоти педагог ходимининг хизмат вазифаларини бажаришига тўсқинлик қилиш учун ҳам жавобгарлик кучайтирилмоқда.
Бунда кодексдаги санкциялар фуқароларга базавий ҳисоблаш миқдорининг 10 бараваридан 15 бараваригача, мансабдор шахсларга эса 15 бараваридан 20 бараваригача (6 миллион сўм) миқдорда жарима солади. Ёки 15 суткагача маъмурий қамоққа олишга сабаб бўлади.
Изоҳ (0)