«Дарё» нашри 12 декабрда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Эрдўғон Грецияни Тайфун баллистик ракетаси ҳужумидан огоҳлантирди
Агар Греция АҚШдан олинган қуролларни Додеканес архипелагига юборса, бу Анқаранинг Тайфун баллистик ракетаси билан жавоб қайтаришига сабаб бўлади, дея огоҳлантирди Туркия президенти Ражаб Тоййиб Эрдўғон.
«Ҳозир биз ўз ракеталаримизни ишлаб чиқаришни бошлаганмиз, бу грекларни қўрқитмоқда. Тайфун десангиз, греклар қўрқиб кетади ва ‘У Афинага зарба беради’, дейди. Ҳа, зарба беради, агар сиз ороллар учун Америкадан нимадир сотиб олишга уринсангиз, Туркия каби давлат бирор чора кўриши керак», — деган Туркия президенти.
Тайфун ракетаси Туркия ҳарбийлари томонидан октябрь ойида синовдан ўтказилган эди. Туркия матбуоти манбаларининг қайд этишича, Тайфун ракеталари Туркияда бир неча йил давомида яширин равишда ишлаб чиқилган. Мамлакат расмийларининг таъкидлашича, ракета 561 км масофани 456 сонияда босиб ўта олади.
Эрдўғоннинг таҳдидларида гап Додеканес ороллари гуруҳи ҳақида кетмоқда. Ороллар узоқ вақт давомида Усмонли империяси, 1912—1947 йилларда эса Италия томонидан назорат қилинган — бу 1923 йилда Лозанна шартномаси билан тасдиқланган.
Иккинчи жаҳон урушидан сўнг, Буюк Британия ва Греция олдидаги оролларни назорат қилиш Париж тинчлик шартномасига биноан, Грецияга топширилди. Туркия даъво қилишича, архипелагнинг қуролсизлантирилган мақомига қарамай, Греция оролларда ҳарбий салоҳиятини оширмоқда.
Греция эса Анқара оролларда қуролли кучларнинг бўлиши ҳақидаги шартномаларни нотўғри талқин қилаётганини таъкидлаган.
Россия ҳарбийлари Эрон дронларидан қайта фойдаланишни бошладими?
Американинг Урушни тадқиқ қилиш институти (ISW) ўзининг кунлик шарҳида ёзишича, Россия қўшинлари Украина ҳудудига зарбалар беришда Эронда ишлаб чиқарилган учувчисиз учар қурилмалардан фаолроқ фойдалана бошлаган.
ISW қайд этишича, Россия ҳарбийлари уч ҳафталик танаффусдан кейин, 7 декабрь куни Украина ҳудудига зарбалар бериш учун Эрон дронларидан фойдаланишни қайта бошлаган. Шундан бир неча кун аввалроқ NBC News телеканали Оқ уйдаги манбаларига таяниб, Россия ҳукумати дронлар эвазига Эронга «мисли кўрилмаган даражада» ҳарбий ва техник кўмак кўрсатаётгани ҳақида ёзганди.
ISW фикрича, Россия ҳарбийлари, катта эҳтимол билан, Эрондан дронларнинг янги партиясиниолган ёки яқин кунларда уларнинг етказиб берилиши кутилмоқда. Бундан ташқари, шарҳ муаллифлари Россия қўшинлари дронлардан фойдаланмаган уч ҳафта давомида уларни тўплаш билан шуғулланганини ҳам истисно қилмаяпти.
Зеленский Киев Америка билан ўз позицияларини мувофиқлаштириб олганини айтди
Украинанинг ҳаво ҳужумидан мудофаа тизимини кучайтириш Вашингтон учун устувор вазифа. Бу ҳақда АҚШ президенти Жо Байден украиналик ҳамкасби Владимир Зеленский билан телефон суҳбатида айтиб ўтди, дейилади Оқ уй сайтидаги баёнотда.
Зеленский Байден билан музокаралардан сўнг ўзининг Telegram каналида видеомурожаат эълон қилди. Унга берган изоҳида Украина президенти Киев G7 саммити олдидан «Америка билан ўз позицияларини мувофиқлаштириб олганини» ёзган. G7 таркибига Буюк Британия, Германия, Италия, Канада, Франция, Япония ва АҚШ киради, шунингдек, саммитларда Европа Иттифоқи ҳам иштирок этади. Г 7 нинг навбатдаги саммити онлайн форматда бўлиб ўтади ва унда Украина иштирок этади.
Эслатиб ўтамиз, Украина Россиянинг мамлакат инфратузилмасига берган сўнгги зарбаларидан кейин Ғарб давлатларини ҳаво ҳужумидан мудофаа тизимларини қўллаб-қувватлашни кучайтиришга чақирганди.
Ўзбекистоннинг «Ипотека банк»и Венгрияга сотилди
Бугун, 12 декабрь куни Тошкент шаҳрида «Ипотека банк»даги давлат улушини хусусийлаштириш бўйича шартномани имзолаш маросими бўлиб ўтди. Бу ҳақда «Дарё» мухбири хабар бермоқда.
Тадбирда бош вазир ўринбосари – инвестициялар ва ташқи савдо вазири Жамшид Хўжаев нутқ сўзлаб, Ўзбекистон банки биринчи марта хорижий компанияга сотилганини айтди.
Венгриянинг OTP банкининг Ўзбекистонга кириб келиши рақамлаштириш, банк хизматлари сифатини янада оширишига ишонамиз. Қолаверса, бу келишув икки давлат ўртасидаги ҳамкорликни ривожлантиради. Биринчи марта хорижий банк Ўзбекистон банкини сотиб олмоқда.
«Ипотека банк» Ўзбекистондаги бешинчи йирик банк бўлиб, умумий бозорнинг 8,5 фоизини ташкил этади ва 1,6 миллиондан ортиқ мижозга эга.
Тадбирда OTP банки бошқарув раиси Шандор Чанйи узоқ муддатли мақсад OTP Group’ни Ўзбекистон банк бозорининг асосий иштирокчисига айлантириш эканини айтди. «Ипотека банк» АТБ бошқаруви раиси Элёр Иномжонов банк сотилган нархни очиқлашни истамади. Унинг айтишича, шартнома якунланса, умумий нарх айтилади.
«Биринчи босқичда банкнинг 75 фоиз давлат улуши сотилади. Қолган 25 фоизи 3 йил давомида Молия вазирлиги қўлида қолади. Якунда қолган 25 фоиз ҳам OTP банкка ўтади», — деган у.
Маълум қилинишича, 2020 йил охиридан бошлаб OTP банк Ўзбекистон ҳукумати билан Ўзбекистонда банк секторини хусусийлаштиришда иштирок этиш имкониятлари бўйича музокаралар олиб бормоқда. 2021 йилнинг кузидаги музокараларда томонлар «Ипотека банк»ни сотиб олиш имконияти бўйича ўзаро англашув меморандумини имзолаган бўлса, бугун олди-сотди шартномасини имзолади.
Изоҳ (0)