Украина музлатилган Россия активларидан биринчи маблағни олди. Бу ҳақда Украина бош вазири Денис Шмигал ўзининг Telegram каналида маълум қилди.
“Украина Россиянинг музлатилган активларидан олинган даромад эвазига илк 1 миллиард долларни олди. Бу АҚШ G7 ташаббуси доирасида Россия активларидан фойдаланиш орқали ажратишга қарор қилган 20 миллиард долларнинг биринчи қисмидир”, деб таъкидлади Шмигал. Бош вазир Киев белгиланган миқдорнинг бошқа қисмини қачон олишига аниқлик киритмади.
20 декабрь куни Украина Москванинг музлатилган активларидан маблағ олиш имконини берувчи келишувларни имзолагани маълум қилинганди.
Октябрь ойида G7 етакчилари қўшма баёнот қабул қилиб, улар Украинага 50 миллиард долларлик кредит ажратиш бўйича келишувга эришганликларини эълон қилишганди. Шу билан бирга, Қўшма Штатлар Украинага 20 миллиард доллар ажратишга ваъда берди, қолган 30 миллиард доллар эса “Еттилик гуруҳи” ва Европа иттифоқининг биргаликдаги саъй-ҳаракатлари билан ажратилади.
Россия президентининг матбуот котиби Дмитрий Песковнинг айтишича, Россия Европадаги активлари ўғирланишига албатта жавоб қайтаради. Унинг таъкидлашича, Москва бунга алоқадор шахсларни қонуний жавобгарликка тортишни ташкил этиш ниятида. Кремль вакилига кўра, Европа Киевга ёрдам бериш учун Россия активларидан фойдаланишга қарор қилиб, энг ёмон йўлни танлаган.
Изоҳ (0)