Германия ҳукумати Россиянинг музлатилган активларини мусодара қилиш ва улардан Украинага ёрдам бериш учун фойдаланиш ҳақидаги АҚШнинг режаларига эҳтиёткорона муносабатда, дея Deutsche Welle хабар берди.
Бизнинг позициямиз ўзгаришсиз қолмоқда: биз активларнинг ўзи ҳақида эмас, музлатилган активлардан олинган даромад ҳақида гапиряпмиз, — деди ҳукумат расмийси Штефан Ҳебештрайт Берлиндаги матбуот анжуманида.
Германия Молия вазирлиги вакили Россия активларидан олинган даромадлар ишлатилишини қўшимча қилган, аммо Россия Марказий банкининг активлари дахлсиз бўлиб қолади.
Бу халқаро ҳуқуқнинг давлат дахлсизлиги каби асосий тамойиллари сақланиб қолганлигини англатади, — дейди у.
Мазкур изоҳлар 24–25 май кунлари Италияда бўлиб ўтадиган G7 давлатларининг молия вазирлари йиғилиши олдидан билдирилган. Учрашувда вазирлар Украинага ёрдам бериш учун Россиянинг музлатилган активларидан фойдаланиш бўйича умумий позицияни келишиш ниятида.
Аввалроқ Американинг WSJ нашри Германия товон тўлашдан қўрқиб, Россия активларини мусодара қилишга қарши чиқаётганини айтган эди. Нашрга кўра, АҚШ ва Буюк Британия Россия активларини мусодара қилишни Украинанинг Россия билан урушдаги ғалабаси учун “ҳал қилувчи” чора деб ҳисоблаган.
АҚШ давлат котиби Энтони Блинкен май ойида Киевга ташрифи чоғида ҳукумат Украина учун Россиянинг АҚШ банкларидаги активларини мусодара қилиш ниятида эканини айтган. Америка банкларида Россиянинг 5 миллиард долларлик активлари музлатилган. Дунё бўйлаб бу активлар тахминан 300 миллиард долларни ташкил қилади. Уларнинг тахминан 200 миллиард евро қисми Европа Иттифоқида блокланган.
Россия ҳукумати мамлакат маблағларини, шу жумладан, улардан кўрилган даромадларни олиб қўйишнинг ҳар қандай вариантини экспроприация деб ҳисоблаб, бу ёмон оқибатларга олиб келиши ҳақида огоҳлантирган.
Изоҳ (0)