Европа иттифоқи саммити Украинада ҳарбий ҳаракатлар тугамагунча ва мамлакатга товон пуллари тўланмагунча Россия активлари Европада блокланиши тўғрисида қонуний қарор қабул қилди. Бу қарор фақат бошқа саммитда бир овоздан қабул қилинган резолюция билан қайта кўриб чиқилиши мумкин.
“Европа иттифоқи халқаро ҳамкорлар билан келишилган ҳолда Украинани тиклаш, реконструкция қилиш ва реабилитация қилишни қўллаб-қувватлашга содиқ қолади. 2025 йил июль ойида Италияда бўлиб ўтадиган Украинани қайта қуриш бўйича конференция шу нуқтаи назардан катта аҳамиятга эга бўлади”, дейилади саммит якунлари бўйича қабул қилинган Европа иттифоқи резолюциясида.
Охирги бир неча ой ичида Европа иттифоқи Россиянинг музлатилган давлат активларидан (Европада тахминан 260 миллиард евро музлатиб қўйилган) даромадларни кредитлар кўринишида Украинага ўтказмоқда.
1 декабрь куни лавозимга киришган Европа дипломатияси раҳбари Кая Каллас Украина учун ушбу маблағларни тўлиқ мусодара қилиш бўйича муҳокамаларни қайта бошлашни таклиф қилди. Bloomberg хабар беришича, Европа иттифоқи ушбу қарорнинг ҳуқуқий ва молиявий оқибатларини муҳокама қилмоқда.
Октябрь ойида "Еттилик гуруҳи" (G7) мамлакатлари молия вазирлари Россиянинг музлатилган активларидан тушган маблағлар ҳисобидан тўланадиган Украинага 50 миллиард долларлик кредит тафсилотлари ҳақида баёнот эълон қилганди.
Баёнотда тўловлар 2024 йил декабрь ойида бошланиши, шунингдек, барча маблағлар 2027 йил охиригача ўтказилиши айтилган.
“Асосий қарз ва фоизлар бизнинг ҳуқуқий тизимларимиз ва халқаро қонунчилигимизга мувофиқ, Европа иттифоқи ва бошқа G7 мамлакатлари юрисдикцияларида жойлашган Россия суверен активларини иммобилизация қилишдан келиб чиқадиган фавқулодда тушумлар ҳамда бошқа ҳар қандай ихтиёрий бадаллар ҳисобидан қопланади”, дейилади ҳужжатда.
Кредитлар G7 мамлакатлари томонидан икки томонлама форматда тақдим этилади. Уларнинг ҳар бири 2025 йил 30 июндан кечиктирмай кучга киради. G7 мамлакатларига кредитларни тўлаш учун маблағлар “ҳар бир икки томонлама кредитнинг асосий суммасига мутаносиб равишда” тақсимланади.
Изоҳ (0)