Қозоғистонда болалар ва ўсмирлар учун махсус SIM карталарни жорий этиш масаласи кўриб чиқилмоқда. Бу карталар айрим сайтлар ва ижтимоий тармоқларга киришни чеклайди. Бу ҳақда Республика халқ таълими вазири ўринбосари Эдил Оспан маълум қилган.
Эдил Оспаннинг айтишича, болалар сим-картаси - бу болалар ва ўсмирлар учун ишлаб чиқилган мобил алоқа учун махсус тариф режаси. Амалдорнинг сўзларига кўра, бу карталар болалар хавфсизлиги учун зарур: SIM карталарга махсус филтр ўрнатилади, бу эса болаларга баъзи сайтларга киришга ва интернетдаги маълум контентни кўришга йўл қўймайди.
“Ҳозирда SIM картани жорий этиш масаласи ваколатли давлат органлари билан биргаликда муҳокама қилинмоқда. Болалар учун ушбу картани жорий этишни биз аллақачон комплекс режа лойиҳасига киритдик. Бизнинг фикримизча, операторлар айнан болалар фойдаланиши учун мўлжалланган махсус сим-карталарни чиқариши керак. Ота-оналар ўз фарзандлари учун айнан шу сим-карталарни сотиб олишга мажбур бўлади. Боиси бугунги кунда операторлар болалар учун махсус тарифларни фақат таълим ресурсларига кириш доирасида таклиф қилмоқда, бироқ болаларнинг интернетдаги хавфсиз хатти-ҳаракатларини назорат қилишни таъминламаяпти”, деди Эдил Оспан.
Вазирлик ғоясига кўра, болалар SIM-карталари қуйидаги афзалликларга эга бўлади:
- ота-она назорати - ота-оналар боланинг телефондан қандай фойдаланаётганини кузатиб боришлари мумкин;
- хавфсизлик - номақбул контентдан ҳимоя қилиш учун ўрнатилган филтрлар;
- геолокация - мобил илова орқали боланинг жойлашган жойини кўриш имконияти.
SIM-карталар қачон сотувга чиқиши ҳозирча номаълум.
Изоҳ (0)