Wildberries (“РВБ” МЧЖ Россия резиденти) маркетплейсининг Ўзбекистондаги фаолияти солиқ қонунчилигидаги айрим талабларга мос келмаслиги аниқланди, деб хабар бермоқда Солиқ қўмитаси матбуот хизмати.
Қайд этилишича, Wildberries Ўзбекистонда WB Int Export МЧЖ шаклида юридик шахс ташкил этиб фаолиятини амалга ошириб келмоқда. Ташкилотда солиқ аудити ўтказилиб, 2022—2024 йиллар учун бюджетга қўшимча ҳисобланган 51,2 миллиард сўм (шундан, 42,8 миллиард сўм ҚҚС) солиқ тўловлари тўланди.
Солиқ қўмитаси барча солиқ тўловчиларга ягона ва объектив ёндашувни қўллаб-қувватлаб, солиқ мажбуриятларини бажариш учун тенг шароитларни яратишга амал қилади. Фаолиятни Ўзбекистон қонунчилиги талабларига тўлиқ риоя қилган ҳолда амалга ошириш солиқ органлари билан ўзаро очиқ муносабатларни таъминлайди ҳамда эътирозлар билдириш учун асосларни истисно қилади, дейилади хабарда.
Қўмита электрон тижорат фаолиятини амалга ошираётган субъектлар фаолиятини легаллаштириш бўйича тизимли ишлар давом эттирилишини билдирди.
Wildberries йирик халқаро онлайн ритейлери Ўзбекистонда ўз фаолиятини 2022 йилда йўлга қўйганди. Wildberries аёллар, эркаклар ва болалар кийимлари, оёқ-кийимлар ва аксессуарлар, китоблар, зоомаҳсулотлар, техника буюмлари ва бошқа маиший товарлар каби Россия ҳамда халқаро брендлардан қарийб 20 миллиондан зиёд товарларини Ўзбекистон аҳолисига тақдим этмоқда.
Wildberries бугунги кунда дунёнинг 20 та мамлакатида, шу жумладан, Россия, Қозоғистон, Беларусь, Германия, Франция, Буюк Британия, Болтиқбўйи мамлакатлари, АҚШ ва бошқа кўплаб мамлакатларда ўз фаолиятини олиб бормоқда.
Бундан аввал 2025 йил 20 мартдан бошлаб Ўзбекистонда Temu платформасидан фойдаланиш чекланиши ҳақида хабар берилган эди. Ушбу электрон савдо платформаси Ўзбекистоннинг электрон тижорат, чакана савдо, реклама, шахсий маълумотларни ҳимоя қилиш, истеъмолчилар ҳуқуқларини ҳимоя қилиш, муаллифлик ҳуқуқи ва турдош ҳуқуқлар соҳасидаги қонун ҳужжатлари талабларига риоя этмаётгани аниқланган.
Изоҳ (0)