Қозоғистоннинг Манғистов вилояти Мўйноли туманидаги уйда 7 киши ис газидан заҳарлангани ҳақида хабар берилганди. Фавқулодда вазиятлар вазирлигининг ахборот хизмати “Дарё”га қурбонларнинг бир нафари Ўзбекистон фуқароси эканини маълум қилди.
Манғистов вилояти ҳокимлиги қурбонларнинг бари Ўзбекистон фуқаролари экани ҳақида хабар тарқатганди.
Ўзбекистонлик эркак Қозоғистонга бориб, у ерда оила қурган. Аёли ва болалари Қозоғистон фуқаролари ҳисобланади, дея изоҳ берди ФВВ ахборот хизмати.
Марҳум 1980 йил Қороқалпоғистонда туғилган. Фожиа 2 март куни Басқудуқ қишлоғидаги хусусий уйда содир бўлган. Ёрдамга етиб келган қутқарувчилар ва тез тиббий ёрдам бригадалари воқеа жойида етти кишини аниқлаган. Улардан беш нафари вояга етмаганлар бўлган, барчаси вафот этган.
Дастлабки версиясига кўра, ҳодиса газ ускуналаридан фойдаланиш қоидаларининг бузилиши оқибатида юз берган. Фавқулодда ҳодиса сабабларини текшириш учун комиссия тузилган. Ҳалок бўлган оиланинг яқинларига ҳар томонлама ёрдам кўрсатилади, жумладан, дафн маросими ўтказилади. Вазият Мангистов вилояти ҳокимининг шахсий назоратига олинган.
Изоҳ (0)