Жаҳон олтин кенгаши (WGC) маълумотларига кўра, 2025 йил бошида дунё марказий банклари олтин сотиб олишни фаол давом эттирди. Унинг соф харидлари 18 тоннани ташкил этди. WGC фикрига кўра, геосиёсий хавфларнинг ортиши фонида олтин захира сифатида сотиб олинаётгани унинг стратегик аҳамияти юқори эканидан дарак беради.
Ўзбекистон Марказий банки январда 8 тонна олтин сотиб олди. Натижада қимматбаҳо металлнинг халқаро захиралардаги улуши 82 фоизга етиб, 391 тоннани ташкил қилди.
Олтинни энг кўп сотиб олган давлатлар орасида иккинчи ўринни 5 тонна билан Хитой Марказий банки эгаллади. Январь охирига келиб, Хитой захираларидаги олтин ҳажми 2285 тоннага (умумий активларнинг 6 фоизи) етди. Учинчи ўринда эса Қозоғистон Марказий банки жойлашди, қўшнилар 4 тонна олтин харид қилган. Кейинги ўринларда Польша ва Ҳиндистон (ҳар бири 3 тонна), Чехия (2 тонна) ҳамда Қатар (1 тонна) жойлашди.
Асосий сотувчилар қаторига эса Россия ва Иордания Марказий банклари (ҳар бири 3 тонна), шунингдек, Қирғизистон (2 тонна) кирди. Ўзбекистон январь ойида олтин экспорт қилмаган.
Ўзбекистон олтин-валюта захиралари 2025 йил 1 январь ҳолатига кўра 41,18 миллиард долларни ташкил этди.
Ўзбекистон нега олтин сотиб олди?
Ўзбекистоннинг олтин сотиши ёки сотиб олиши асосан нархларга боғлиқ. Марказий банк олтин нархи ошса, сотади, нарх пасайса, сотиб олади.
Айни пайтда бир троя унсия олтиннинг нархи 2 минг 900 доллардан баландроққа баҳоланмоқда.
Изоҳ (0)