Президент матбуот котиби Шерзод Асадов Қозоғистоннинг кўплаб етакчи ОАВларини бирлаштирган ҳолдинг асосчиси билан учрашув ўтказди.
Хабарга кўра, бугун, 25 февраль куни Қозоғистоннинг Tengrinews, “Массагет”, “Вести”, “Жулдиз ФМ”, “Тенгри ФМ” ва бошқа кўплаб етакчи оммавий ахборот воситаларини бирлаштирган Alash Media Group ҳолдингининг асосчиси ва бош директори Зауре Казибаева билан учрашув бўлиб ўтган.
“Икки давлат раҳбарларининг сиёсий иродаси ва биргаликдаги саъй-ҳаракатлари туфайли Ўзбекистон—Қозоғистон муносабатлари мисли кўрилмаган даражага кўтарилганини мамнуният билан қайд этдик”, дейди президент матбуот котиби.
Шунингдек, учрашувда медиа соҳасида ўзаро манфаатли ҳамкорликни ривожлантиришга оид масалаларнинг кенг доираси батафсил муҳокама қилинган. Бу қардош халқлар ўртасидаги дўстлик ришталарини мустаҳкамлашга хизмат қилиши ҳақида фикр билдирилди.
Оммавий ахборот воситаларга қўшма лойиҳаларни амалга оширишда, жумладан, контент алмашиш, пресс-турлар уюштириш, Ўзбекистон ва Қозоғистоннинг бой тарихий ва маданий меросини халқаро миқёсда илгари суришда уларга ҳар томонлама кўмаклашишга келишиб олинган.
Шу ўринда қайд этиш жоиз, Alash Media Group ҳолдинг вакиллари “Дарё” офисига ҳам ташриф буюрди ва ўзаро ҳамкорлик алоқаларини йўлга қўйиш масалалари муҳокама қилинди.
Изоҳ (0)