Қозоғистондаги биринчи атом электр станцияси (АЭС) Олмаота вилоятининг Жамбил туманида қурилади. Республика ҳукуматининг тегишли қарори кучга кирди. Бу ҳақда Tengrinews хабар берди.
Қозоғистон ҳукумати қарор қилади: Атом электр станцияси ядровий қурилмаси қуриладиган ҳудуд сифатида Олмаота вилоятининг Жамбил тумани белгилансин, дейилади ҳужжатда.
Республикада АЭС қурилиши жойи тўғрисидаги қарор 2024 йил 30 декабрда қабул қилинган. У 25 февраль куни расман эълон қилинди. Илгари президент Қосим-Жўмарт Тўқаев мамлакатда АЭС қурилишини жадаллаштириш бўйича кўрсатма берган эди. Энергетика вазирлиги эса мамлакатга камида учта АЭС зарурлигини таъкидлаган.
2024 йил 6 октябрда Қозоғистонда АЭС қурилиши бўйича референдум ўтказилди. Қозоғистонликларнинг 71,12 фоизи қурилишни қўллаб-қувватлади. Сайловчиларнинг овоз беришда иштирок этиш даражаси 63,66 фоизни ташкил этди.
Қозоғистон АЭС қурилиши учун потенциал технология етказиб берувчилар билан рақобатбардош мулоқотни якунлаган. Энергетика вазирлиги Қозоғистондаги биринчи атом электр станцияси 8 йил ичида қурилиши мумкинлигини таъкидлади.
Изоҳ (0)