2024 йил давомида Қирғизистон банк сектори активлари 32,8 фоизга ўсди. Бу кўрсаткич Ўзбекистон ва Қозоғистондагидан сезиларли юқори.
Қозоғистон банк сектори
Ўтган йили Қозоғистон тижорат банкларининг умумий активлари 19,7 фоизга ўсиб, 61,56 трлн тенгени ташкил этди. Бу ўзбек валютасида деярли 1,58 квадриллион (123,7 млрд доллар) дегани. Йил давомида қўшни мамлакат банкларининг бирортасида активлар пасайиши кузатилмаган.
2024 йилда Қозоғистон банк секторининг кредит портфели 20 фоизга ёки 5,98 триллион тенгега ошиб, 35,84 триллион тенгени (924,7 трлн сўм) ташкил этган.
Мамлакат тижорат банклари 2,56 трлн тенге (66 трлн сўм) соф фойда кўрган. Республикадаги 21 та банкдан олтитасида ўзининг йиллик соф фойдаси ўтган йилга нисбатан пасайган.
Ўзбекистон банклари кўрсаткичлари
2024 йилда Ўзбекистон тижорат банклари (жами 36 та) активлари миқдори 18 фоизга ўсиб, умумий ҳисобда 769,3 трлн сўмни (2023 йилда 652,1 трлн сўм) ташкил этган. Банклар кредит портфели 533,1 трлн сўм (2023 йилда 471,4 трлн сўм), депозитлари 308,7 трлн сўм (шундан бир йил илгари 241,7 трлн сўм) бўлган.
2024 йилда республика тижорат банклари бир йил аввалгига қараганда икки баробарга кам — 6,96 трлн сўм соф фойда олган (2023 йилда 12,4 трлн сўм). Аксарият давлат банкларининг молиявий натижаси ёмонлашган, хусусий банкларда эса ўсиш кузатилган.
Қирғизистон банк сектори тез ўсди
2024 йилда Қирғизистон тижорат банкларининг жами активлари 32,8 фоизга ўсиб, 815,7 миллиард сомга (120 трлн сўм) етди. Таққослаш учун, 2023 йилда қирғиз банкларининг активлари 614,2 миллиард сом бўлган.
Мамлакатда 304 та филиал тармоғига эга 21 та тижорат банки фаолият юритмоқда. Улардан бештаси ислом молиялаштириш тамойилларига мувофиқ хизматлар кўрсатади.
Ўтган йил якунларига кўра, қўшни давлат банклари кредит портфели 32,2 фоизга ўсиб, 340,7 миллиард сомга етган. Депозитлари ҳажми 592,4 миллиард сомни ташкил этган.
Йил давомида Қирғизистон банк тизимининг соф фойдаси 31,1 миллиард сом (4,6 трлн сўм) бўлди. Бу 2023 йилдагидан (24,2 миллиард сом) 28,5 фоизга кўп. Бунда истеъмол кредитлари улуши қарийб 77,8 фоизга ошган ва 99,2 миллиард сомга етган. Ипотека кредитлари ҳажми ўсиши 30,5 фоиз бўлган. Умуман олганда, юқоридаги уч давлат орасида Қирғизистон банкларидаги ўсиш кескин тезлашган.
Изоҳ (0)