“Навоий азот” заводидаги лабораторияда портлаш бўлди. ФВВ содир бўлган ҳолат тўғрисида маълумот берди.
Маълум қилинишича, бугун, 11 март куни соат 14:10 да Навоий вилояти, Навоий шаҳар, Навоий кўчасида жойлашган “Навоий азот” АЖнинг 25-цехи лабораториясида газ-ҳаво аралашмасининг чақнаши ҳодисаси рўй берган. Чақнаш натижасида ёнғин келиб чиққан.
Шунга кўра, ҳодиса жойига 10 та ёнғин-қутқарув экипажи етиб бориб, ҳозирда ёнғинни бартараф этиш ишлари олиб борилмоқда.
Воқеа жойига вилоят ФВБ бошлиғи, ИИБ, ССБ, прокуратура ходимлари етиб борган. Бу вазият бўйича ФВВ ахборот хизмати томонидан қўшимча маълумот тақдим этилиши айтилди.
Бундан аввал Қашқадарёдаги заправкада иккита цистерна ёниб кетгани хабар қилинганди.
Шунингдек, 20 февраль куни Андижон вилоятининг Шаҳрихон туманидаги заправкада ҳаво-газ аралашмасининг чақнаши содир бўлганди. Оқибатда икки нафар фуқаро тан жароҳати олганди. 21 февраль куни Тошкент шаҳридаги автомобиллар ювиш жойида ёнғин юз берди. Ҳодиса оқибатида ҳеч ким тан жароҳати олмаган. Ҳалок бўлганлар ҳам йўқ.
Изоҳ (0)