Фарғона шаҳридаги цехда содир бўлган ёнғин оқибатида бир киши ҳалок бўлди. Бу ҳақда вилоят ФВБ матбуот хизмати хабар берди.
21 декабрь куни соат 14:13 да Фарғона шаҳар “Мустақиллик” МФЙ Кимёгар кўчасида жойлашган солидор ва литол ишлаб чиқариш цехида ёнғин содир бўлаётгани юзасидан хабар келиб тушган.
Ёнғин қутқарувчилар ҳодиса жойига 14:21 да етиб борган ва ёнғин 14:24 да ўраб олиниб, 14:32 да батамом ўчирилган.
Ёнғин оқибатида бир киши воқеа жойида вафот этган. Ҳозирда ёнғиннинг келиб чиқиши сабаби ва зарари аниқланмоқда.
Бундан бир неча кун аввал Фарғона шаҳридаги заправкада портлаш ва ёнғин содир бўлганди. Суюлтирилган газ тўкиш вақтида технологик жараёнларнинг бузилиши ҳамда техника хавфсизлиги қоидаларига риоя қилинмаслиги оқибатида чақнаш содир бўлган, ундан сўнг ёнғин юзага келган. Бунинг оқибатида дастлаб бир нафар фуқаро вафот этгани, тўрт нафар фуқаро тан жароҳати олган, саккиз нафар фуқаро тиббиёт ходимлари назоратида экани маълум қилинди. Кейинроқ яна 3 киши шифохонада вафот этди. Ҳолат юзасидан жиоят иши қўзғатилиб, 5 киши қамоққа олинган. Ҳодисадан кейин ҳоким қарори билан вилоятдаги барча заправкаларнинг белгиланган норма ва меъёрларга мувофиқлиги ҳолатини ўрганиб чиқиш топширилди.
Изоҳ (0)