Rocheстер технология институти тадқиқотчилари атмосферадан карбонат ангидридни чиқариб ташлашнинг табиий жараёнларини тезлаштириш учун 1620 та термоядро бомбасини портлатишни таклиф қилди.
Олимларнинг огоҳлантиришича: агар Ердаги ўртача ҳарорат кўтарилишда давом этса, аср охирига келиб жаҳон иқтисодиётига 200 триллион доллар зарар етиши ва юз миллионлаб одамларнинг яшаш шароитлари кескин ёмонлашиши мумкин. Бунга йўл қўймаслик учун улар ноодатий ечим таклиф қилмоқда — ҳар бири 50 мегатонна бўлган 1600 дан ортиқ термоядро зарядларини сув остида портлатиш.
Тадқиқотчиларнинг таъкидлашича, термоядровий портлашлар базалт каби силикат жинсларнинг нурашини тезлаштириши мумкин. Бу жараён карбонат ангидридни ўзига бириктириб, уни атмосферадан чиқариб ташлайди. Кичик миқёсда бундай усул аллақачон қўлланилмоқда: Бразилияда компаниялар, жумладан Google базалтни майдалаш ва уни қишлоқ хўжалиги ерларига тарқатиш бўйича лойиҳаларни молиялаштирмоқда. Бироқ олимлар фикрича, бундай чоралар глобал таъсир учун камлик қилади.
Таклиф қилинган вариантга кўра, портловчи моддалар денгиз тубига 4 километр чуқурликда жойлаштирилади, устида эса 8 километр сув қатлами мавжуд бўлади. 800 атмосферали босим зарба тўлқинини ютиши, тахминан 81 гигатоннали портлаш қуввати эса тоғ жинсларининг тез парчаланишини таъминлаши керак. Олимларнинг фикрича, бу ҳолда радиация энг паст даражада бўлиб, океан экотизимига деярли таъсир кўрсатмайди.
Ҳисоб-китобларга кўра, портлашнинг таъсири 30 йиллик CО₂ чиқиндиларининг йўқолишига тенг бўлади. Акс ҳолда, олимлар океанларнинг кислоталашуви тезлашиши, маржон рифлари нобуд бўлиши ва бошқа экологик фалокатлар юз беришини башорат қилмоқда.
Бироқ термоядро портлашларидан бундай катта миқёсда фойдаланиш қанчалик хавфсиз эканлиги ҳақидаги савол ҳамон очиқ қолмоқда.
Изоҳ (0)