Сергелидаги портлаш: 15 ёшли бола вафот этди, минглаб хонадонлар зарарланди (фото, видео)

Тошкент шаҳрининг Сергели туманидаги “Қурувчилар” даҳасида жойлашган омборхонада портлаш содир бўлди. Натижада 15 ёшли бола ўлди, минглаб хонадонларга зарар етди. “Дарё” мухбири воқеа жойида бўлиб, воқеа ҳақида репортаж тайёрлади. 

“Қаттиқ силкинишдан уйғондик, жуда баланд овоз ва ёруғ эди” 

Воқеа кечаси 02:30—03:00 атрофида содир бўлди. Биринчи қаттиқ силкинишдан уйғондик, жуда баланд овоз, ёруғ бўлиб кетди. Қарасак, портлаш содир бўлган экан. Ойналар синди. Менга ва катта ўғлимга зарар етди. Шундан сўнг болаларимизни кийинтириб, пастга олиб тушдик. Хавфсизроқ бўлган жой — машинамга чиқиб ўтирдик, — дейди Салоҳиддин Қаршибоев. 

“Портлаш зарбидан йиқилиб тушдим”

Ухламай ўтиргандим, адашмасам, соат 02:30 ларда омборхонада ёнғин бўлаётганди. Мен воқеани тасвирга ола бошладим. Кўп ўтмай, портлаш содир бўлди. Уйимиз деразаси олдида тасвирга олаётган бўлсам, портлаш зарби мени орқага отиб юборди. Деразалар синди, оиламиз билан кўчага чиқдик. Омбор узоқ ёнди, — дейди воқеага гувоҳ бўлган Ислом Мирзаев.

“Ҳамма нарса синганди”

Кечаси соат 02:30 лардан сўнг ер қимирлагандек силкиниш содир бўлди. Нима бўлаётганини билмадик. Болаларимиз устига ойналар тушган. Ҳамма нарса синганди. Шовқин-сурон билан кўчага чиқдик. Кўчага чиқиб билсак, ер қимирламаяпти, ёнғин содир бўлаётган экан, — дейди Дилфуза Атаева. 

“Банғиллаган овоз эшитилди, ўрнимдан туриб, уйнинг силтанишини кўриб, ер қимирлаяпти, деб ўйладим”

Банғиллаган овоз эшитилди, ўрнимдан туриб, уйнинг силтанишини кўриб, ер қимирлаяпти, деб ўйладим. Олов чўғи уйгача отиларди. Шиша синиқлари уйга кирди. Хайрият, ҳеч кимга тегмади. Жудаям қўрқиб кетдим, болаларимни олиб, кўчага югуриб чиқдим, — дейди воқеага гувоҳ бўлган яна бир суҳбатдош Замира Умарова.

Тошкент шаҳар Сергели тумани “Қурувчи” МФЙ Хонобод кўчасида жойлашган Inter Logistics МЧЖга қарашли омборхоналар ҳудудида чақнаш оқибатида ёнғин содир бўлгани тўғрисида хабар ФВБга 28-сентябр куни соат 02:43 да келиб тушган. Шунга кўра, ёнғин-қутқарув бўлинмалари соат 02:48 да ёнғинга етиб бориб, тезкор ҳаракатлар натижасида, соат 05:02 да ёнғин қуршаб олинган ва соат 10:47 да батамом ўчирилган.

Қайд этилишича, ёнғинни бартараф этиш ишларига ФВВ ва бошқа тегишли ташкилотлардан жами 210 та техника ва 2000 дан ортиқ шахсий таркиб жалб қилинди. Дастлабки ўрганиш ишларига кўра, 15 минг квадрат метр омборхона майдонида ёнғин ўчирилиб, 30 минг квадрат метр майдони сақлаб қолинди.
Вазият тўлиқ назоратга олиниб, ҳозирда унинг оқибатларини бартараф этиш ишлари амалга оширилмоқда.
Содир бўлган ёнғин юзасидан дастлабки терговга қадар суриштирув ишлари ва моддий зарар миқдорини аниқлаш ишлари Тошкент шаҳар прокуратураси, Ички ишлар бош бошқармаси ва Фавқулодда вазиятлар бошқармаси томонидан ҳамкорликда олиб борилмоқда.

Ҳодиса оқибатида жабрланганларнинг умумий сони 163 кишини ташкил этди, бир нафар ўсмир ҳодиса оқибатида вафот этди. Мазкур ҳолат юзасидан ИИВ Тергов департаменти томонидан Жиноят кодексининг 259-моддаси (ёнғин хавфсизлиги қоидаларини бузиш) 2-қисми “а” ва ”б” бандлари билан жиноят иши қўзғатилди. Содир бўлган фавқулодда ҳодисани ўрганиш, кўрилган талафотларни бартараф этиш ва жабрланганларга ёрдам кўрсатиш бўйича президент топшириғига кўра ҳукумат комиссияси тузилди.