Qashqadaryo viloyati Kasbi tumanidagi yonilg‘i quyish shoxobchasida yong‘in sodir bo‘ldi, deb xabar bermoqda Favqulodda vaziyatlar vazirligi.
Qayd etilishicha, 10-mart kuni “Do‘stlik” MFY hududidagi shoxobcha hovlisida 2 ta 9 tonnali sig‘im yongan. Voqea joyiga 4 ta yong‘in qutqaruv bo‘linmasi soat 22:04 da yetib borib, 22:33 da yong‘inni to‘liq o‘chirgan.
Yong‘in oqibatida 2 kishi kuyish jarohatini olgan. Hozirda ularning ahvoli yaxshi. Halok bo‘lgan fuqarolar yo‘q.
Yong‘in sababi va zarariga aniqlik kiritilmoqda.
20-fevral kuni Andijon viloyatining Shahrixon tumanidagi zapravkada havo-gaz aralashmasining chaqnashi sodir bo‘lgandi. Oqibatda ikki nafar fuqaro tan jarohati olgandi. 21-fevral kuni Toshkent shahridagi avtomobillar yuvish joyida yong‘in yuz berdi. Hodisa oqibatida hech kim tan jarohati olmagan. Halok bo‘lganlar ham yo‘q.
