Инсон ўз ишида чинакам маҳоратга эришганида ривожланишга иштиёқ қолмаслиги хавфи пайдо бўлади. Бироқ кўпчилик янги чўққиларни забт этишни хоҳлайди.
Мелисса Маккарти — “Мени кечира оласизми?”
Мелисса Маккарти — комедияда ўзини ажойиб тарзда намоён этган актриса. Экранларда унга кўпинча ёқимтой, кулгили қиз ролини беришарди ва Мелисса буни жуда яхши уддаларди. Аммо драматик ролда ҳам актриса ўз маҳоратини тўла намоён эта олди. У “Мени кечира оласизми?” номли биографик драмада бош ролни ижро этди. Мелисса бутунлай бошқа амплуада бўлишига қарамай, томошабинлар ва кинотанқидчилар унинг ижросидан ҳайратга тушишди. Бу роли учун актриса ҳатто “Оскар” мукофотига номзод бўлган.
Адам Сендлер — “Бўшаб қолган шаҳар”
Адам Сендлернинг карьерасини барқарор дейиш қийин. У кўплаб фильмларда рол ўйнаган, комедик истеъдодини намойиш этган ва кўплаб мукофотларга номзод бўлган. Агар “Бўшаб қолган шаҳар” фильмидаги роли бўлмаганида, томошабинлар комедиячи ҳақиқатан ҳам ажойиб драматик рол ўйнаши мумкинлигини ҳеч қачон билмаган бўларди. Доимий қувноқ одам ўрнига Адам фожиали вазият туфайли бутун оиласини йўқотишни енгишга ҳаракат қилаётган Чарли ролини ўйнайди. Комедик актёр учун бу мураккаб образ эди, лекин Сендлер буни уддалади.
Стив Карелл — “Тулки овчиси”
Стивнинг юлдузли роли “Офис” сериалидаги Майкл Скотт образи эди. Ўшанда томошабинлар Кареллнинг актёрлик маҳоратига қаойил қолишади. У бу рол учун кўплаб мукофотлар олади, ҳатто бир журнал уни “Энг қувноқ инсон” деб атайди. Стив комедия жанридаги фильмларда суратга тушишни давом эттириб, истеъдоди билан мухлисларни хурсанд қилади. Бироқ у қувноқ одам қиёфасида қолиб кетмаслик ва драматик ролларга ўтишга қарор қилади. Бу борадаги дебюти 2014 йилда экранларга чиққан “Тулки овчиси” фильми бўлди. Курашчилар ҳақидаги бу драма Кареллга ўзининг актёрлик истеъдодини тўлиқ намоён этиш имконини берди.
Роуэн Аткинсон — “Мегре”
Роуэн жаноб Бин образи билан шунчалик уйғунлашиб кетганки, у деярли 30 йил давомида бу образни ўйнаб, бир образ “асири”га айланган. Бошқа роллари, масалан, Жонни Инглиш ҳам деярли ўхшаш. Томошабинларга актёрнинг ҳазил туйғуси ва кулгили қаҳрамонларни ўйнаши ёқарди. Аммо Аткинсон йўналишини ўзгартиришга қарор қилиб, комиссар Мегре образини яратади. Актёрнинг ўзи комиссар саргузаштлари ҳақидаги китобларнинг катта мухлиси, шунинг учун томошабинлар ҳайратда қолишади, Роуэннинг ўзи эса унга ишонмаганларга нималарга қодирлигини кўрсатиб қўяди.
Кунал Найяр — “Шубҳа остида”
Кўплаб мухлислар Кунални “Катта портлаш назарияси” ситкомидаги астрофизик Ражеш Кутраппали сифатида эслайди. Жуда келишган, аммо уятчан Раж 12 йил давомида асосий қаҳрамонлардан бири бўлган, бироқ Кунал Найяр кулгили образ қурбонига айланмади. У 2022 йилда “Шубҳа остида” номли триллерда бош ролни ижро этади. Сериал танқидчилардан турли хил баҳолар олади ва биринчи мавсумдан сўнг тўхтатилади. Гарчи лойиҳа ҳаммага ҳам ёқмаган бўлса-да, Куналнинг актёрлик маҳорати кўплаб мухлисларни ижобий маънода ҳайратда қолдирди.
Изоҳ (0)