Яманнинг Эл-Байда провинциясидаги ёқилғи қуйиш шохобчаси (АЁҚШ) ва газ омборининг портлаши оқибатида 10 киши ҳалок бўлди, 65 киши турли жароҳатлар олди. Бу ҳақда Yemen Online хабар берди.
Заҳар туманида содир бўлган портлаш занжирли реакцияга сабаб бўлган. Оқибатда қўшни иккита ёқилғи қуйиш шохобчаси ва яқин атрофдаги тижорат омборлари ёниб кетган. Портлаш пайтида ёнилғи қуйиш шохобчасида мижозлар кўп эди. Бу тартибсизликка олиб келган, одамлар ёнаётган мажмуани тарк этиши қийинлашган.
Маҳаллий ҳукумат вакилининг сўзларига кўра, ёнилғи қуйиш шохобчасидаги портлаш оқибатида камида 10 киши ҳалок бўлган ва 65 дан ортиқ киши жароҳатланган.
“Расмийлар портлашнинг сабабини ҳали ҳам ўрганмоқда, бу ноаниқ бўлиб қолмоқда”, дея хабар берди Yemen Online.
17 декабрь куни Фарғона шаҳридаги кўп ёнилғили АЁҚШ ва АГҚШ шохобчасида портлаш ва ёнғин содир бўлганди. Суюлтирилган газ тўкиш вақтида технологик жараёнларнинг бузилиши ҳамда техника хавфсизлиги қоидаларига риоя қилинмаслиги оқибатида чақнаш содир бўлган, ундан сўнг ёнғин юзага келган.
Ёнғин оқибатида дастлаб бир нафар фуқаро вафот этгани, 4 нафар фуқаро тан жароҳати олган, 8 нафар фуқаро тиббиёт ходимлари назоратида экани маълум қилинган. Кейинроқ яна 3 киши шифохонада вафот этган.
Ҳолат юзасидан Жиноят кодексининг 257-моддаси (меҳнатни муҳофаза қилиш қоидаларини бузиш) 3-қисми “а” банди ҳамда 259-моддаси (ёнғин хавфсизлиги қоидаларини бузиш) 3-қисми “а” банди билан жиноят иши қўзғатилиб, жиноят иши доирасида 5 киши қамоққа олинди.
Изоҳ (0)