Агар пандемия бошланмаганида эди, Ҳиндистоннинг жиноятларга тўла Дҳарави номли хароба маҳалласида яшаган Малишани дунё танимаган бўлар эди. Коронавирус касаллигининг глобал миқёсда тарқалиши туфайли тобора қатъий чекловлар қўйилган бир пайтда, ҳиндистонлик ёш қиз моделлик пойдеворида ўзининг муносиб ўрнини эгаллаш йўлида илк қадамларини ташлаган.
“Бу мен учун кутилмаган ҳаёт бурилиши эди”
2020 йилда америкалик актёр Роберт Ҳоффман янги клип суратга олиш учун Мумбайга келади. Бироқ COVID пандемияси туфайли уйига қайта олмайди. Шу сабабли ишсиз ўтиришни истамаган актёр фурсатдан унумли фойдаланиб, Ҳиндистоннинг энг йирик шаҳри ва молиявий пойтахти — Дҳаравида қуйи табақа вакилларининг бошидан кечираётган қийинчиликлар ҳақида фильм суратга олишга қарор қилди. Сўнг маҳаллий аҳоли билан яқиндан танишишга ва дўстона алоқаларни ўрнатишга муваффақ бўлди. Шундай танишлардан бири Ҳоффманга харобалар орасида яшайдиган гўзал қиз таърифи гақида сўзлаб беради.
Қизалоқни кулбасимон уйдан излаб топган актёр унинг гўзал ва камтарин кўринишидан лол қолади, аммо Малишани клипида суратга тушириш фикридан қайтади. Аввалига у қизалоқни аллақачон модел бўлиб ишлайдиган ва бошқалар билан аллақачон шартнома тузган профессионал, деб ўйлайди.
“Мен ундан у билан ким ишлашини сўрадим. У ҳеч ким деб жавоб берганида, нега ҳеч ким уни илгари пайқамаганини тушунолмадим”, дейди Ҳоффман.
Маълум бўлишича, ёш Малиша аввалдан модел бўлишни орзу қилган. Бунга уни ҳинд актрисаси, модел ва хонанда Приянка Чопра Жонасдан сабаб бўлган.
Кейинчалик Малиша моделлик бизнеси мавжудлиги ҳақида подиумда кетаётган машҳур аёлларни кўргандагина билиб қолган. Машҳур моделлардек эътироф ва олқишга сазовор бўлишни истаган қиз моделликни орзу қила бошлаган.
“Орзулардан ҳеч қачон воз кечманг”
Малиша Харва олтинчи синфда ўқиб юрган кезлари мактабдаги устози унга “Ҳеч қачон орзуларингиздан воз кечманг”, дей бебаҳо маслаҳатлар берган.
Бу тавсия унинг ҳаётий шиорига айланди ва мақсадига эришишга ёрдам берди. Унинг отаси Малишанинг болалиги одатдагидек ўтишига ишонч ҳосил қилгач, Ҳоффман билан шартнома тузишга рози бўлди ва иккаласи ҳам қизалоқнинг таълими доимо устувор бўлишига келишиб олишди. Музокаралар якунида Роберт Ҳоффман расман Малишанинг шахсий менежери этиб тайинланди.
Бу воқеа унинг ҳаётида бурилиш нуқтаси бўлди ва унга моделлик оламига кириш эшикларини очди.
Моделлик фаолияти
Америкалик актёр имижмейкер фаолиятини бошлаб юборди ва ўн икки ёшли “актриса” иштирокида қисқа метражли фильм суратга олди. Ҳоффман видеони ижтимоий тармоққа жойлаштирди. Моделни тарғиб қилишнинг навбатдаги босқичи нодавлат ташкилотлар ва АҚШнинг Ҳиндистондаги элчихонаси билан боғланиш бўлди.
Шу тариқа у Малишани эҳтимолий айбловлардан ҳимоя қилиш ва бутун жараённинг шаффофлигини кўрсатишни мақсад қилди.
“Биргина видео етарли бўлишини билар эдим. Ўша постдан бери барчанинг диққати унга қаратила бошлади”, деди Ҳоффман.
Сўнг менежер ижтимоий тармоқларда маблағ йиғиш кампаниясини йўлга қўйди ва Малишага “харобадан чиққан малика” дея ном берди. Бундан ташқари у ГоФундМе платформасида қизалоқ учун аккаунт яратди. У ерда “малика”ни молиялаштириш учун турли лойиҳалар танланди.
Бир неча ой давомида Малиша кўплаб мухлисларга эга бўлди. Улар қизни қўллаб-қувватлаш учун ўн минг доллардан кўпроқ пул йиғишди. Шу тариқда Малиша Cosmopolitan Индиа ва Тҳе Пеаcоcк мода журналларида суратга тушди. Сўнг ёш модел ҳашаматли косметика бренди кампаниясининг юзига айланди.
Шу тариқа Малиша ўзининг меҳнати ва истеъдоди билан тез орада моделлик соҳасида муваффақият қозонди. 2023 йилда у Ҳиндистоннинг нуфузли “Форест Эссентиалс" косметика брендининг “Ювати Селеcтион” кампаниясининг юзи бўлди. Бу кампания орқали Малиша нафақат ўз орзуларини амалга оширди, балки кўплаб ёш қизлар учун илҳом манбаига айланди.
Йиғиб қўйган пуллари эвазига эса қизалоқ оиласини Мумбайнинг жиноятга тўла маҳалласининг шафқатсиз чангалидан чиқариб олишга муваффақ бўлди. Эндиликда ёш модел ўзининг отаси ва амакиваччалари билан бирга қулайроқ квартирада яшайди.
Профессионал модел Малиша Харва
Малиша Instagram платформасида “слум принcесс” (харобадан чиққан малика) номи билан танилган. Ўз саҳифаси орқали шахсий ҳаёти, моделлик фаолияти ва орзулари ҳақида бўлишади. Унинг ижтимоий тармоқлардаги постлари кўплаб ёшларга илҳом бағишлайди.
Ҳозирда Малиша ўрта мактабдаги таълимини давом эттирмоқда ва моделлик фаолиятини ривожлантирмоқда.
“Мен ҳар доим ўқиш ва янги билимларни эгаллашга қизиқиб келганман. Мактабдаги яхши баҳоларим отамни жуда хурсанд қилади, шунинг учун мен доимо яхши баҳо олишга ҳаракат қиламан! Инглиз тили эса менинг севимли фаним”, дейди ёш модел.
“Мен оиламга ёрдам бериш учун супермодел бўлишга умид қиламан” дейди у ижтимоий тармоқдаги саҳифасида.
Изоҳ (0)