Agar pandemiya boshlanmaganida edi, Hindistonning jinoyatlarga to‘la Dharavi nomli xaroba mahallasida yashagan Malishani dunyo tanimagan bo‘lar edi. Koronavirus kasalligining global miqyosda tarqalishi tufayli tobora qat’iy cheklovlar qo‘yilgan bir paytda, hindistonlik yosh qiz modellik poydevorida o‘zining munosib o‘rnini egallash yo‘lida ilk qadamlarini tashlagan.
“Bu men uchun kutilmagan hayot burilishi edi”
2020-yilda amerikalik aktyor Robert Hoffman yangi klip suratga olish uchun Mumbayga keladi. Biroq COVID pandemiyasi tufayli uyiga qayta olmaydi. Shu sababli ishsiz o‘tirishni istamagan aktyor fursatdan unumli foydalanib, Hindistonning eng yirik shahri va moliyaviy poytaxti — Dharavida quyi tabaqa vakillarining boshidan kechirayotgan qiyinchiliklar haqida film suratga olishga qaror qildi. So‘ng mahalliy aholi bilan yaqindan tanishishga va do‘stona aloqalarni o‘rnatishga muvaffaq bo‘ldi. Shunday tanishlardan biri Hoffmanga xarobalar orasida yashaydigan go‘zal qiz ta’rifi gaqida so‘zlab beradi.
Qizaloqni kulbasimon uydan izlab topgan aktyor uning go‘zal va kamtarin ko‘rinishidan lol qoladi, ammo Malishani klipida suratga tushirish fikridan qaytadi. Avvaliga u qizaloqni allaqachon model bo‘lib ishlaydigan va boshqalar bilan allaqachon shartnoma tuzgan professional, deb o‘ylaydi.
“Men undan u bilan kim ishlashini so‘radim. U hech kim deb javob berganida, nega hech kim uni ilgari payqamaganini tushunolmadim”, deydi Hoffman.
Ma’lum bo‘lishicha, yosh Malisha avvaldan model bo‘lishni orzu qilgan. Bunga uni hind aktrisasi, model va xonanda Priyanka Chopra Jonasdan sabab bo‘lgan.
Keyinchalik Malisha modellik biznesi mavjudligi haqida podiumda ketayotgan mashhur ayollarni ko‘rgandagina bilib qolgan. Mashhur modellardek e’tirof va olqishga sazovor bo‘lishni istagan qiz modellikni orzu qila boshlagan.
“Orzulardan hech qachon voz kechmang”
Malisha Xarva oltinchi sinfda o‘qib yurgan kezlari maktabdagi ustozi unga “Hech qachon orzularingizdan voz kechmang”, dey bebaho maslahatlar bergan.
Bu tavsiya uning hayotiy shioriga aylandi va maqsadiga erishishga yordam berdi. Uning otasi Malishaning bolaligi odatdagidek o‘tishiga ishonch hosil qilgach, Hoffman bilan shartnoma tuzishga rozi bo‘ldi va ikkalasi ham qizaloqning ta’limi doimo ustuvor bo‘lishiga kelishib olishdi. Muzokaralar yakunida Robert Hoffman rasman Malishaning shaxsiy menejeri etib tayinlandi.
Bu voqea uning hayotida burilish nuqtasi bo'ldi va unga modellik olamiga kirish eshiklarini ochdi.
Modellik faoliyati
Amerikalik aktyor imijmeyker faoliyatini boshlab yubordi va o‘n ikki yoshli “aktrisa” ishtirokida qisqa metrajli film suratga oldi. Hoffman videoni ijtimoiy tarmoqqa joylashtirdi. Modelni targ‘ib qilishning navbatdagi bosqichi nodavlat tashkilotlar va AQShning Hindistondagi elchixonasi bilan bog‘lanish bo‘ldi.
Shu tariqa u Malishani ehtimoliy ayblovlardan himoya qilish va butun jarayonning shaffofligini ko‘rsatishni maqsad qildi.
“Birgina video yetarli bo‘lishini bilar edim. O‘sha postdan beri barchaning diqqati unga qaratila boshladi”, dedi Hoffman.
So‘ng menejer ijtimoiy tarmoqlarda mablag‘ yig‘ish kampaniyasini yo‘lga qo‘ydi va Malishaga “xarobadan chiqqan malika” deya nom berdi. Bundan tashqari u GoFundMe platformasida qizaloq uchun akkaunt yaratdi. U yerda “malika”ni moliyalashtirish uchun turli loyihalar tanlandi.
Bir necha oy davomida Malisha ko‘plab muxlislarga ega bo‘ldi. Ular qizni qo'llab-quvvatlash uchun o‘n ming dollardan ko‘proq pul yig‘ishdi. Shu tariqda Malisha Cosmopolitan India va The Peacock moda jurnallarida suratga tushdi. So‘ng yosh model hashamatli kosmetika brendi kampaniyasining yuziga aylandi.
Shu tariqa Malisha o‘zining mehnati va iste’dodi bilan tez orada modellik sohasida muvaffaqiyat qozondi. 2023-yilda u Hindistonning nufuzli “Forest Essentials" kosmetika brendining “Yuvati Selection” kampaniyasining yuzi bo‘ldi. Bu kampaniya orqali Malisha nafaqat o‘z orzularini amalga oshirdi, balki ko‘plab yosh qizlar uchun ilhom manbaiga aylandi.
Yig‘ib qo‘ygan pullari evaziga esa qizaloq oilasini Mumbayning jinoyatga to‘la mahallasining shafqatsiz changalidan chiqarib olishga muvaffaq bo‘ldi. Endilikda yosh model o‘zining otasi va amakivachchalari bilan birga qulayroq kvartirada yashaydi.
Professional model Malisha Xarva
Malisha Instagram platformasida “slum princess” (xarobadan chiqqan malika) nomi bilan tanilgan. O‘z sahifasi orqali shaxsiy hayoti, modellik faoliyati va orzulari haqida bo‘lishadi. Uning ijtimoiy tarmoqlardagi postlari ko‘plab yoshlarga ilhom bag‘ishlaydi.
Hozirda Malisha o‘rta maktabdagi ta’limini davom ettirmoqda va modellik faoliyatini rivojlantirmoqda.
“Men har doim o‘qish va yangi bilimlarni egallashga qiziqib kelganman. Maktabdagi yaxshi baholarim otamni juda xursand qiladi, shuning uchun men doimo yaxshi baho olishga harakat qilaman! Ingliz tili esa mening sevimli fanim”, deydi yosh model.
“Men oilamga yordam berish uchun supermodel bo‘lishga umid qilaman” deydi u ijtimoiy tarmoqdagi sahifasida.
Izoh (0)