Модель ва бизнесвумен Роузи Ҳантингтон-Уайтли моделлик бизнесида 21 йиллик тажрибага эга бўлса-да, унинг карьераси доим ҳам муваффақиятли бўлмагани ҳақида сўзлаб берди.
Reign with Josh Smith подкастига берган интервьюсида 37 ёшли Роузи ўзининг моделлик фаолиятидаги тажрибаси, турли брендлар томонидан рад жавобини олгани ҳамда муваффақиятсизликка учрагани ҳақида интервью берди.
Моделнинг сўзларига кўра, авваллари рад жавобини доим оғир қабул қилар ва омадсиз кунларида тезда тушкунликка тушиб қолар эди. Бир куни Роузини айнан суратга олиш пайтида сёмкани тўхтатиб, уни уйига юборишган. Бу воқеа юлдузга қаттиқ таъсир қилган. Бироқ Ҳантингтон-Уайтли йиллар давомида муваффақиятсизликларга бўлган муносабатини ўзгартирди ва ҳаётидаги ҳар бир қора чизиқни профессионал фаолиятининг бир қисми сифатида қабул қилишга ўрганди.
“Агар бирор ишим самара бермаса, демак бу нарса мен учун эмас экан, деб ўйлайман ва вазиятни холисона қабул қиламан. Ёки яна бир бор рад жавобини олсам, демак нотўғри эшикни қоқаётган эканман дейман ва мени қабул қилишлари мумкин бўлган бошқа жойлардан имконият излайман”, — деди у.
Мураккаб вазиятларда моделга унинг турмуш ўртоғи Жейсон Стейтем далда бўлган. Жуфтлик 2009 йилдан бери бирга ва икки нафар фарзанди — олти ёшли Жек ва икки ёшли Изабелла бор. Актёр Жейсон Стейтем Роузни ҳар ишда қўллаб-қувватлаган ва рафиқасига ўз нуқтаи-назарини ҳимоя қила олиш, салбий фикрларга эътибор бермасликни ўргатган:
“Жейсон турли вазиятларда ўз ҳақ-ҳуқуқларини ҳимоя қилишни яхши билади. У менинг таянчим ва мен ундан кўп нарсаларни ўрганганман”, — деди Роузи Ҳантингтон-Уайтли.
Изоҳ (0)