Kanada AQSH prezidenti Donald Tramp tomonidan uning tovarlariga joriy etilgan 25 foizlik bojga javoban xuddi shunday choralar ko‘radi. Bu haqda Kanada bosh vaziri Jastin Tryudo ma‘lum qildi.
AQSHdan keltirilayotgan 155 milliard Kanada dollari (106,5 milliard AQSH dollari) qiymatidagi mahsulotlarga 25 foizli boj solinadi. 4-fevraldan 30 milliard Kanada dollari miqdoridagi mahsulotlarga nisbatan, undan uch hafta o‘tgach esa qolgan summaga nisbatan choralar kuchga kiradi. Amerika bojlari ham 4-fevraldan amal qila boshlaydi.
AQSH energiya resurslaridan tashqari barcha Kanada tovarlariga 25 foizlik boj joriy qildi — ularga boj 10 foizni tashkil qiladi.
“Energiya manbalariga nisbatan pastroq stavka benzin yoki kommunal xizmatlar narxlarining sezilarli darajada oshishini oldini olish maqsadini ko‘zlaydi”, deydi AQSH ma’muriyatining yuqori lavozimli amaldori.
Tryudo qo‘shimcha qilishicha, Kanada energiya resurslari va strategik ahamiyatga ega materiallar bilan bog‘liq notarif choralarni ham qo‘llashi mumkin. Shuningdek, u kanadaliklarni mahalliy mahsulotlarni xarid qilishga va AQSHga emas, o‘z mamlakatida dam olishga chaqirdi.
Tramp 3 ta davlatga bojlar joriy qildi
AQSH Kanada, Xitoy va Meksikadan keltirilayotgan tovarlarga bojxona to‘lovlarini joriy etadi. Prezident Donald Tramp tegishli farmonni 1-fevral kuni imzoladi. U mazkur qarorini noqonuniy migrantlar va giyohvand moddalar kontrabandasi tahdidi bilan izohladi. Bunga javoban Xitoy AQSHni savdo urushi boshlanishidan ogohlantirdi.
AQSH Xitoydan import bojlarini yana bir bor oshirgach, Pekin Vashingtonni savdo urushi xavfi haqida ogohlantirdi. Xitoy Tashqi ishlar vazirligi bayonotida “savdo yoki bojxona urushida” g‘oliblar bo‘lmasligi ta’kidlangan.
“Qo‘shimcha 10 foiz miqdoridagi bojlar mamlakatlar o‘rtasidagi narkotrafikka qarshi kurashda ikki tomonlama hamkorlikka ta’sir qilishi va unga zarar yetkazishi muqarrar”, deyiladi vazirlik xabarida.
Xitoy “yangi bojlarni qat’iyan rad etishi” va “o‘z huquq va manfaatlarini qat’iy himoya qilishi uchun “tegishli javob choralarini ko‘rishi”ni ta‘kidladi. Endilikda Xitoy Jahon savdo tashkilotiga (JST) AQSHga qarshi shikoyat qilish niyatida.
Izoh (0)