Донецк вилоятининг Великая Новоселка қишлоғи россияликлар назоратига ўтган бўлиши мумкин. Америка урушни ўрганиш институти, агар Россия Мудофаа вазирлиги томонидан билдирилган мазкур даъво тасдиқланса, рус армиясида ҳужум ҳаракатларини давом эттириш учун бир нечта вариант пайдо бўлишини маълум қилди. Бу ҳақда ISW’нинг навбатдаги ҳисоботида сўз боради.
“Великая Новоселка бир нечта дарёлар бўйида жойлашган бўлиб, Россия армиясининг келгуси тактик ҳаракатларини қийинлаштириши мумкин. Қолаверса, мураккаб рельеф сабаб рус қўшинларининг ҳудуд қўлга киритилгандан кейин Ғарбий Донецк йўналиши бўйлаб операцион ютуқларга эришиш имконияти ҳам пасаяди”, деб ёзади ISW.
Ҳисоботда ёзилишича, руслар аҳоли пунктини эгаллаб олгандан кейин қандай ҳаракат қилиши борасида бир нечта тахминлар мавжуд.
Биринчи вариант: Россия ҳарбий қўмондонлиги Донецк вилоятининг ғарбида ўз бўлинмаларини сақлаб қолиб, Донецк ва Днепропетровск вилоятлари маъмурий чегараси томон ҳужумни давом эттиришга қарор қилиши мумкин. Бу Россия учун маъмурий чегарага иложи борича тезроқ етиб бориш бошқа йўналишлардаги ҳужумлардан кўра муҳимроқ эканини англатади.
Иккинчи вариант: Россия қўмондонлиги Великая Новоселка яқинида айрим кучларни сақлаб, чекланган ҳужумларни давом эттириш орқали Украина қўшинларини бу ҳудудда банд қилиб туриши мумкин. Шу билан бирга, ўз кучларининг асосий қисмини бошқа фронт чизиғига кўчириш эҳтимоли ҳам мавжуд.
“Россия қўшинлари ҳозирда Купянск, Боровой, Часов Яр, Торецк ва Покровск йўналишларида ҳужум операцияларини кучайтирмоқда. Шу билан бирга, улар Украина кучларининг Курахов йўналиши ва Курск вилоятидаги қолдиқларини бартараф этиш билан шуғулланмоқда”, деб ёзади таҳлилчилар.
Учинчи вариант: Украина расмийлари Россия жорий йили Запорожье вилоятида интенсив жанговар ҳаракатларни қайта бошлашга урғу бериши мумкинлиги ҳақида огоҳлантирди.
Таҳлилчиларнинг фикрича, Россия ҳарбий қўмондонлиги ўз кучларини саналган йўналишларнинг исталганига ташлаши мумкин. Бу эса, ўз навбатида, Россия қўмондонлигининг баҳор ва ёз мавсуми учун устувор йўналишларини кўрсатиб беради.
Великая Новоселкада нимга гап?
Россия қўмондонлиги Донецк вилоятида жойлашган қишлоқни тўлиқ эгаллаганини даъво қилмоқда. РФ Мудофаа вазирлиги мазкур аҳоли пунктида ёзиб олингани айтилган видеони эълон қилди. Унда аскарлар бино томига ўз байроқларини ўрнатаётганини кўриш мумкин.
Аммо Украина Қуролли кучларининг Донбассга масъул “Хортица” оператив-стратегик гуруҳига кўра, мазкур аҳоли пункти учун жанглар давом этяпти.
Украина қуруқлик кучлари 110-бригада вакиллари таъкидлашича, Россия Великая Новоселкадан сўнг ҳужумни давом эттира олмайди, чунки улар қийин тўсиқ — Мокрие Яли дарёси билан тўқнаш келган.
Изоҳ (0)