Украина армияси 6 февраль куни Россиянинг Курск вилоятида бошланган ҳужумлари давомида камида битта аҳоли пунктини назорат остига олишга эришди ва Сужа шаҳридан жануби-шарқда 5 километргача ичкарига кириб борди. Бу ҳақда Американинг Урушни ўрганиш институти (ISW) кундалик ҳисоботида маълум қилди.
Экспертлар таъкидлашича, Украина ҳарбийлари “Махновкадан жануби-ғарбга (Сужадан жануби-шарққа) ва Сужа-Обойян йўли бўйлаб Черкасская Конопелкадан шимол ва шарққа силжишган ҳамда Колмаковни қўлга киритишган”.
Шунингдек, Черкасская Конопелка ва Фанасеевка қишлоқларида Украина кучлари борлиги қайд этилган, бироқ уларнинг 6 февралда кун охиригача бу ҳудудларни ўз назорати остида сақлаб қолгани аниқ эмас. Бундан ташқари, Украина ҳарбийларининг Уланок қишлоғи томон ҳаракат қилаётгани ҳақида хабар берилган.
Колмаков – Сужанинг жануби-шарқидаги қишлоқ бўлиб, урушдан олдин у ерда 79 киши истиқомат қилган.
Россиялик ҳарбий блогерлар мамлакат ҳарбийларининг катта миқдордаги Украина ҳарбий техникасини йўқ қилишга эришганини таъкидлашса-да, шу билан бирга Украина томони эришган бир қатор тактик ютуқларни ҳам тасдиқлашмоқда.
Украина армияси мудофаамизга 5 км ичкаригача кириб борди, деб ёзади “Два майора” Telegram канали.
Шунингдек, Украина ҳарбийлари Фанасеевка ва Черкасская Конопелкада бўлгани қайд этилган. Россия манбаларига кўра, Украина ҳарбийлари ҳужумнинг “асосий мақсадига ҳозирча эриша олмаган”, чунки улар нисбатан йирик Уланок қишлоғига кира олмаган.
Россия Мудофаа вазирлиги бир кун олдин Россия қўшинлари Украина армиясининг “Курск вилоятининг Черкасская Конопелка ва Уланок аҳоли пунктлари йўналишидаги қарши ҳужум ҳаракатларига уринишини барбод қилгани” ва “барча ҳужумларни қайтаргани”ни маълум қилган эди.
Украина ҳарбийлари ўтган йилнинг 6 августида Курск вилоятида ҳужум бошлаган эди. Ўшандан бери Россиянинг ушбу минтақаси ҳудудининг бир қисми Украина Қуролли кучлари назорати остида қолмоқда. Россия ҳарбийлари ҳудуднинг бир қисмини қайтариб олишга муваффақ бўлган бўлса-да, Суж тумани маркази ва унга туташ ҳудудлар вақти-вақти билан қарши ҳужумга ўтишга уринаётган Украина ҳарбийлари назорати остида қолмоқда.
Украина расмий вакиллари Курск вилоятидаги операциянинг Украина позицияларини мустаҳкамлашда, жумладан, эҳтимолий тинчлик музокараларида муҳим аҳамиятга эга эканлигини таъкидлашмоқда. Операция танқидчилари эса, Россия ҳарбийларининг сўнгги олти ой ичида Донецк вилоятида олдинга силжиб, бир қатор шаҳарларни эгаллаб олганини қайд этган.
Изоҳ (0)