Урушда Россия ҳарбийлари томонидан Украина армиясининг асир олинган аскарларини қийноққа солиш ҳолатлари кескин кўпайди, деб хабар бермоқда БМТнинг Украинадаги инсон ҳуқуқлари бўйича мониторинг миссияси.
Бундай қатллар Россия расмий шахслари томонидан қисман қўллаб-қувватланмоқда, деб таъкидланади миссиянинг 3 февраль куни эълон қилинган янги ҳисоботида.
Олти ой ичида камида 79 нафар Украина аскари ўлдирилди
БМТ кузатувчилари маълумотларига кўра, 2024 йил август ойининг охиридан буён 24 та алоҳида ҳолатда 79 та суддан ташқари қатл ҳолати қайд этилган.
Кўплаб украиналик ҳарбий асирлар таслим бўлганидан сўнг ёки Россия қуролли кучлари назорати остида бўлган пайтда жойида отиб ташланган. Гувоҳлар қуролсиз ва яраланган украиналик ҳарбийларнинг ўлдирилгани бўйича ҳам кўрсатма берган, дейилади БМТ миссияси хабарида.
Шунингдек, хабарда таъкидланишича, қатллар Шарқий Украинанинг Россия армияси ҳужум қилаётган ҳудудларида содир бўлган.
Россияда қатл этишга чақириқлар янграмоқда
Бу ҳодисалар йўқ жойдан пайдо бўлмади. Россия амалдорлари украиналик ҳарбий асирларга нисбатан шафқатсиз муносабатда бўлишга ва ҳатто уларни қатл этишга очиқчасига даъват этдилар, дея таъкидлади миссия раҳбари Даниэль Белл.
Унинг қўшимча қилишича, “жавобгарликдан озод қилиш учун кенг имконият берадиган қонунлар билан биргаликда, бундай баёнотлар ноқонуний хатти-ҳаракатларни рағбатлантириши ёки уларга ундаши мумкин”.
2024 йилда БМТ миссияси Россия амалдорларининг камида учта шунга ўхшаш чақириқларини, шунингдек, “ижтимоий тармоқларда Россия кучлари билан алоқадор қуролланган гуруҳларнинг қатл этишга буйруқ бергани ёки бундай ҳаракатларни маъқуллагани ҳақидаги кўплаб хабарларини” қайд этган.
БМТ “шафқат қилмаслик” ёки “ҳеч кимни тирик қолдирмаслик” бўйича буйруқлар ҳамда чақириқлар халқаро инсонпарварлик ҳуқуқини бузиши ва ҳарбий жиноят ҳисобланишини эслатиб ўтди.
Ҳарбий қўмондонлар ҳамда сиёсий раҳбарлар барча асирга олинган ҳарбий хизматчилар ва жанг ҳаракатларида иштирокини тўхтатган шахсларни ҳимоя қилиш ҳамда уларга инсоний муносабатда бўлишни таъминлаш учун аниқ ва равшан буйруқлар беришлари шарт, дея хулоса қилди Белл.
Изоҳ (0)