Украинанинг Харьков вилояти мудофаасига жавобар бўлган икки генерал ва бир нафар полковник ҳибсга олинди. Бу ҳақда Украина Хавфсизлик хизмати ва Давлат тергов бюроси хабар берди.
Улар ҳарбий ҳолат шароитида ҳарбий хизматга совуққонлик билан муносабатда бўлганликда айбланмоқда. Ҳибсга олинганларнинг исми расмий маълумотларда кўрсатилмаган. Фақат уларнинг лавозимлари ва унвонлари ҳақида маълумот берилади.
Гап бригада генерали Юрий Галушкин, генерал-лейтенант Артур Горбенко ва полковник Илья Лапин ҳақида кетаётган бўлиши мумкин, деб ёзмоқда “Украина ҳақиқати” нашри.
Тергов маълумотларига кўра, “командирларнинг ҳаракатлари шахсий таркиб ва қурол-яроғларнинг йўқолишига олиб келди” ҳамда 2024 йил май ойида Харьков вилоятига Россия армиясининг ҳужуми пайтида “давлат чегарасини ҳимоя қилиш тадбирларини бузди”.
Ҳибсга олинганлар пиёдаларни артиллерия ва ҳаво билан қўллаб-қувватлашни тўғри ташкил этмагани, душман қўшинларининг ҳужум ҳаракатлари ҳақидаги маълумотларни ўз вақтида қўл остидагиларга етказмагани Россия армиясига Харьков вилояти ҳудудига кириб бориш ва уни қисман босиб олиш имконини берди, деб таъкидламоқда Украина хавфсизлик хизмати ва Тергов бюроси.
Зеленский муносабати
Украина Қуролли кучларининг юқори мартабали зобитлари ҳибсга олингани ҳақида Украина президенти Владимир Зеленский ҳам изоҳ берди.
Одамлар на мақом, на ўтмишдаги хизматлари қонун устуворлигини бекор қилмаслигини ҳис қилиши муҳим, деди у.
Сиёсатчи, Россия қўшинлари Украина ерларини босиб олишга ва яна Харьковга киришга уринган даврда бригадаларни бошқаришдаги барча жиноий хатолар тергов қилинишини таъкидлади.
Изоҳ (0)