Novosibirsk viloyatida erkak Tomskdan Adlerga ketayotgan poyezdda yo‘lovchilarga pichoq bilan hujum qildi. Bu haqda Ichki ishlar vazirligi vakili Irina Volk xabar berdi.
Ma’lum qilinishicha, erkak pichoq bilan ikki yo‘lovchiga hujum qilgan, oqibatda erkak va ayol jarohatlangan. Poyezd Barabinsk stansiyasiga yetib kelgach, voqea joyiga politsiya chaqirilgan. Yo‘lovchilar vagondan evakuatsiya qilingan, erkak esa qo‘lga olingan.
Jabrlanganlar shifoxonaga yetkazilgan. Erkak jinoyatga tayyorgarlik ko‘rish, qotillikka suiqasd qilishda ayblanmoqda. Unga qarshi Rossiya Jinoyat kodeksining 30 va 105-moddalari bo‘yicha ish qo‘zg‘atilgan.
Rossiyada 13-yanvarda ham pichoq bilan odamlarga hujum qilingandi. Hodisa Krasnoyark shahridagi xalqaro aeroportda yuz bergan. O‘zbekiston fuqarosi 39 yoshli jabrlanuvchiga pichoq bilan bir necha bor zarba bergan. U ikki nafar guvoh va yetib kelgan politsiyachilar tomonidan qo‘lga olingan. Jabrlanuvchi shifoxonaga olib ketilgandi.
Hujum qilgan erkak 40 yoshli o‘zbekistonlik ekani aniqlangan, u xatti-harakatining sababini izohlay olmagan. Erkak pichoqni terminal kafelaridan birida olgan. So‘roq paytida u mast holatda bo‘lganini bildirgan. O‘zbekiston fuqarosi hujum sodir bo‘lishidan ikki kun oldin uyiga uchib ketish uchun Krasnoyarkka kelgan.
Izoh (0)