Chexiyaning Gradets-Kralov shahridagi savdo markazida sodir etilgan pichoqbozlik oqibatida ikki ayol halok bo‘ldi. Bu haqda mahalliy hokimiyatga tayanib Euronews xabar berdi.
Gumonlanuvchi 16 yoshli o‘smir. U voqeadan o‘n daqiqa o‘tib qo‘lga olingan.
Politsiya ma’lumotlariga ko‘ra, ikkala qurbon ham hujum sodir bo‘lgan do‘konda ishlagan.
Biz taxminan hodisadan 10 daqiqa o‘tib, jinoyat sodir etilgan joydan bir kilometrdan kamroq masofada gumonlanuvchiga yetib oldik. U maxsus kuchlar guruhi tomonidan jinoyat joyida qo‘lga olindi, dedi shahar hududiy politsiyasi matbuot kotibi Iva Kormosova.
Chexiya bosh vaziri Petr Fiala halok bo‘lganlarning yaqinlariga hamdardlik bildirdi.
Bugun Gradets-Kralovoda sodir bo‘lgan voqea mutlaqo tushunarsiz va dahshatli harakatdir, deb yozdi u X ijtimoiy tarmog‘ida.
Hujum sababi hozircha noma’lum, tergov davom etmoqda. Politsiyaning ta’kidlashicha, vaziyat nazorat ostida va endi jamoatchilik uchun xavf tug‘dirmaydi.
Avvalroq Avstriyaning janubidagi Fillax shahrining markaziy maydonida suriyalik erkak pichoq bilan o‘tkinchilarga hujum qilgani haqida xabar berilgan edi.
Hujum oqibatida 14 yoshli o‘smir halok bo‘lgan va yana besh kishi jarohat olgan, ulardan ikki nafari og‘ir ahvolda ekani aytilgan edi. Jinoyatchini qo‘lga olishda yaqin atrofda bo‘lgan suriyalik kuryer muhim rol o‘ynagan. U yangi qurbonlarning oldini olish uchun hujum qilgan erkakni ataylab mashinasida urib yuborgan. Shundan so‘ng hujum qilgan 23 yoshli shaxs qo‘lga olingan. U Avstriyaga Suriyadan kelgan va siyosiy boshpana izlagan. Uning amaldagi yashash ruxsatnomasi bo‘lgan. Hujum sabablari haqida ma’lumot berilmagan. Tergovga ekstremizmga qarshi kurashish bo‘yicha politsiya bo‘linmasi jalb qilingan.
Izoh (0)