Avstriyaning janubidagi Fillax shahrining markaziy maydonida suriyalik erkak pichoq bilan o‘tkinchilarga hujum qildi. Bu haqda BBC xabar berdi.
Hujum oqibatida 14 yoshli o‘smir halok bo‘ldi va yana besh kishi jarohat oldi, ulardan ikki nafari og‘ir ahvolda. Jinoyatchini qo‘lga olishda yaqin atrofda bo‘lgan suriyalik kuryer muhim rol o‘ynadi. U yangi qurbonlarning oldini olish uchun hujum qilgan erkakni ataylab mashinasida urib yubordi.
Hujum qilgan 23 yoshli shaxs qo‘lga olindi. U Avstriyaga Suriyadan kelgan va siyosiy boshpana izlagan. Uning amaldagi yashash ruxsatnomasi bo‘lgan. Hujum sabablari haqida hozircha hech narsa ma’lum emas. Tergovga ekstremizmga qarshi kurashish bo‘yicha politsiya bo‘linmasi jalb qilingan.
Hujum qo‘shni Germaniyada boshpana izlagan afg‘onistonlik mashinada olomonni bosib ketganidan ikki kun o‘tib sodir bo‘ldi. 30 ga yaqin kishi jarohatlandi, 15-fevral kuni ulardan ikki nafari — ayol va uning ikki yoshli qizi shifoxonada vafot etdi. Germaniyada ham, Avstriyada ham immigratsiya jamiyatda o‘ta o‘ng partiyalarga qiziqishni kuchaytiradigan keskin mavzu hisoblanadi.
Izoh (0)