Комил Алламжоновга суиқасд бўйича 10 кишига нисбатан суд ҳукми эълон қилинди. Бу ҳақда Олий суд матбуот хизмати хабар берди.
Эълон қилинган суд ҳукмига мувофиқ Комил Алламжоновга суиқасд ташкилотчилигида айбланган Жавлон Юнусов 18 йилу 6 ойга озодликдан маҳрум қилинди. Жавлон Юнусов Интерпол томонидан қидирувга берилиб, Жанубий Корея Республикасида қўлга олинган ва Ўзбекистонга экстрадиция қилинганди.
Шуҳрат Расулов 23 йилга озодликдан маҳрум қилинди. “Дарё”га маълум бўлишича, у муқаддам Президент давлат хавфсизлик хизмати ўз хавфсизлиги бошқармаси бошлиғи лавозимида ишлаган, Комил Алламжоновга суиқасд буюртмачиси сифатида қўлга олинганди.
Шоҳрух Аҳмедов ва Исмоил Жаҳонгиров 23 йилга озодликдан маҳрум қилинди. Улар Алламжоновга суиқасд иши бўйича ижрочи эканлигини тан олиб, видео тарқатганди.
Дониёр Тошхўжаевга 7 йил муддатга озодликдан маҳрум қилиш жазоси тайинланди.
У 2023 йилнинг августидан Тошкент шаҳар ИИББ бошлиғининг биринчи ўринбосари лавозимида ишлаб келаётганди. 2024 йилнинг ноябрида ушбу лавозимдан олинди. У тергов жараёнига халақит қилган бўлиши мумкин.
Қолган 5 нафар судланувчига қилмишига мувофиқ равишда турли муддатларга озодликдан маҳрум қилиш жазолари тайинланди.
Комил Алламжоновга уюштирилган суиқасд
Президент администрацияси Ахборот сиёсати департаментининг собиқ раҳбари Комил Алламжоновга қуролли ҳужум 2024 йил 26 октябрь тунда уюштирилганди. Range Rover русумли автомашина Қибрай тумани, Ифор кўчаси бўйлаб ҳаракатланган вақтида икки нафар номаълум шахс машинага ўқотар қуролдан бир неча маротаба ўқ узиб, номаълум томонга яширинган. Ҳужум оқибатида бирор-бир шахс тан жароҳати олмаган. Ҳолат юзасидан Жиноят кодексининг 25,97-моддаси (қасддан одам ўлдиришга суиқасд қилиш) билан жиноят иши қўзғатилди.
27 октябрь куни гумонланувчиларнинг бири ушланди. 28 октябрь куни яна уч нафар гумонланувчи қўлга қолинди. Ноябрь ойида эса суиқасдда гумонланиб яна 5 киши қамоққа олинди. Яна 2 кишига нисбатан қидирув эълон қилинди.
27 декабрь куни Бош прокуратура Комил Алламжоновга нисбатан содир этилган қотилликка суиқасд қилиш билан боғлиқ жиноят иши доирасида Чеченистонда яшайдиган икки Россия фуқароси — Бислан Расаев ва Шамил Темирханов Жиноят кодексининг тегишли моддалари билан сиртдан айбланувчи тариқасида жалб қилинганини эълон қилди. Улар қонунга хилоф равишда Ўзбекистонга кириш ва чиқиш, жиноят ҳақида хабар бермаслик ҳамда ўқотар қуролнинг қонунга хилоф муомаласи каби жиноий ҳаракатларни содир этгани аниқланган.
10 январь куни инсон ҳуқуқлари фаоли Абдураҳмон Ташанов Комил Алламжоновга суиқасд иши юзасидан ҳарбий судда маҳкама бошланганини маълум қилди.
Изоҳ (0)