Россия президенти Владимир Путин 19 февраль куни рус армияси Курск вилояти чегарасини кесиб ўтиб, Украина ҳудудига киргани ҳақида баёнот берганди. Украина мазкур баёнотни инкор этди. Бу ҳақда Deutsche Welle хабар берди.
Путиннинг Россия қўшинларининг кенг кўламли ҳужуми ҳақидаги маълумотлари ёлғондир, дея таъкидлади Украина ҳукумати ҳузуридаги Дезинформацияга қарши кураш маркази раҳбари Андрей Коваленко.
Унинг сўзларига кўра, Россиянинг қўпорувчи-разведка гуруҳи Курск вилоятидан Украина ҳудудига киришга муваффақиятсиз уриниш қилган ва йўқ қилинган. Бундан бир оз олдин Путин рус аскарларининг Курск вилояти орқали Украина ҳудудига кирганини эълон қилганди.
Менга атиги бир соат олдин етказилган энг сўнгги маълумотга кўра, бугун тунда 810-бригада жангчилари Россия Федерацияси ва Украина чегарасини кесиб ўтиб, душман ҳудудига чиқишди. Бутун жанговар тўқнашув чизиғи бўйлаб бизнинг қўшинларимиз ҳужумга ўтмоқда, деган эди Путин.
Украина Қуролли кучлари бош штаби ҳам Путиннинг баёнотларини рад этмоқда
Штабнинг 19 февраль кунги долзарб ҳисоботида Россиянинг Украинага қарши уруши пайтида жанговар ҳаракатларнинг Курск йўналиши ҳақида ҳам сўз боради.
Курскда украиналик ҳимоячилар босқинчиларнинг учта ҳужумини қайтармоқда, ҳозирда жами 12 та жанговар тўқнашув қайд этилган. Украина қўшинлари бутун жанговар тўқнашув чизиғи бўйлаб ва фронт ортида душманни ҳолдан тойдирмоқда, деб ёзди Бош штаб Путин баёнотидан кейин.
Ҳисобот эълон қилинган вақтда Украина Мудофаа вазирлиги ва Украина Қуролли кучлари бош қўмондони Александр Сирский томонидан расмий изоҳ берилмаган.
Изоҳ (0)