Узоқ вақт давомида бахтиёрлик ҳисси У-шаклидаги қонуниятга амал қилади, деган фараз устун эди. Унга кўра, инсонлар ёшлигида ташвишсиз, беғубор вақтни ўтказади, кейин ўрта ёшда қийинчиликларга дуч келади, сўнг ёши улғайган сайин ҳаётдан қониқиш ҳисси яна ортади.
Аммо БМТ топшириғига биноан ўтказилган янги тадқиқотга кўра, бахтиёрлик индексининг ушбу модели эндиликда замонамизга тўғри келмайди. Бугунги ёшлар энг бахтли авлод эмас, аксинча, ҳаётдан қониқиш ҳисси ёш ошгани сайин ортиб бормоқда, бир вақтнинг ўзида эса ёшлар руҳий саломатлик билан боғлиқ муаммоларни кўпроқ бошдан кечирмоқда.
Инсоният фаровонлиги бўйича мутахассислар Жин Твенге ва Девид Бланчфлауэр фикрича, сўнгги ўн йил ичида инглиз тилида сўзлашувчи мамлакатлар ёшлари, айниқса, аёллар ўртасида бахтиёрлик даражаси кескин пасайган. Олимлар буни смартфонлар ва ижтимоий тармоқларнинг таъсири билан боғламоқда, чунки фаровонликнинг пасайиши интернетдан фойдаланишнинг кўпайиши билан бир вақтга тўғри келган. Бошқа омиллар қаторида мутахассислар кибербуллингнинг таъсирини ва ташқи кўринишга қараб одамларни баҳолаш маданиятини ҳам қайд этган.
“Ёшлар асосий вақтини ёлғизликда кечирмоқда. Муаммо одамлар экранга қараб соатлаб вақт ўтказишида эмас, балки уларнинг бошқа машғулотлар билан шуғулланмаслигигадир. Замонавий ёшлар дўстлари билан камроқ учрашмоқда, камроқ мулоқот қилмоқда” дейди тадқиқот муаллифларидан бири Девид Бланчфлауэр.
Олимларнинг таъкидлашича, ёшлар ўртасидаги руҳий саломатлик инқирози жиддий ижтимоий ва иқтисодий оқибатларга олиб келиши мумкин, жумладан, меҳнат унумдорлигининг пасайиши ва фаровонлик камайиши туфайли таълим ва ишдан бўшаган одамлар сонининг кўпайиши кутилмоқда. Бирлашган Миллатлар Ташкилоти ушбу ҳодисанинг инглиз тилида сўзлашувчи мамлакатлардан ташқарида қанчалик кенг тарқалганлигини аниқлаш учун қўшимча тадқиқотлар ўтказишни буюрди.
“Биз доим бахтлилик ҳиссининг ҳаёт қийинчиликлари туфайли ёшга қараб камайиб, кейин барқарорлашишига ишонган эдик, аммо энди биз бу назарияни бутунлай қайта кўриб чиқишга мажбурмиз”, дея хулоса қилди Бланчфлауэр.
Изоҳ (0)