Аллергия туфайли оқиши ва шамоллаш қулоқлар саломатлигига таъсир қилади. Агар вақтида керакли чоралар кўрилса, ушбу ёқимсиз ҳолатни қисқа вақт ичида йўқ қилиш мумкин. Бугун шамоллаш вақтида қулоқлар битиб қолганда қандай ёрдам кўрсатиш ҳақида маълумот берамиз.
ЎРВИ пайтида қулоқ битишининг асосий сабаблари
Ўзимизга биринчи ёрдам бериш ва қулоқларни даволашдан аввал нима учун шамоллаш қулоқларга таъсир қилиши ҳақида тушунчага эга бўлиш керак. Бурун бўшлиғи ва синуслар (синуслар — кўз ва бурун атрофи ва бош суяги олд қисми ичидаги бўшлиқлар)да яллиғланиш бор ёки йўқлигини билиш лозим. Чунки бу соҳадаги шамоллашлар эшитиш найчасига таъсир қилади. Бунда унинг деворлари тораяди ва қулоқ битиш ҳисси пайдо бўлади.
Агар ўз вақтида даволанмаса, эшитиш найчасининг яллиғланиши эшитиш қобилиятининг қисман ёки тўлиқ йўқолишига олиб келиши мумкин.
Шамоллаганда бурун битса: биринчи ёрдам қандай кўрсатилади?
Халқ табобатида қулоқ битишидан вақтинчалик халос этадиган бир нечта усуллар мавжуд:
- Аввало бурунни шунчаки қоқиш орқали ортиқча суюқликдан бурун бўшлиғини тозаланг ва тузли эритма билан чайинг. Агар шундан кейин ҳам қулоқ битиши кетмаса, бурун йўлларини бундай усулда тозалашни вақтинчалик тўхтатинг ва унинг ўрнига қон томирларини торайтирувчи махсус бурун спрейи ва томчилардан фойдаланинг.
- Массаж: қулоқ ва бурунни 15 дақиқа давомида массаж қилинг, бунда қулоқ раковинаси ва буруннинг икки четига алоҳида эътибор беринг.
Шамоллаш туфайли битиб қолган қулоқларни тиббий препаратлар ёрдамида даволаш
Агар қулоқларингиз бурун оқиши туфайли битиб қолганда юқоридаги усуллар ёрдам бермаса, дори воситаларидан фойдаланишга ўтиш мумкин.
- Бурунга шифокор рецептисиз бериладиган томирларни торайтирувчи препаратларни томизиш: Бу усул бурун йўллари ва синуслардаги шишларни камайтиради ва натижада эшитиш найчасига келадиган босим йўқолади. Бу эса синус бўшлиғидаги ўтказувчанликнинг яхшиланишига замин яратади. Аммо бундай усул вақтинчалик енгиллик бериб, шифокор томонидан белгиланадиган даволаниш муолажасининг ўрнини боса олмайди.
- Қулоқда яллиғланиш ва шишишни камайтирадиган, микробларга қарши таъсирга эга бўлган махсус томчилардан фойдаланиш мумкин.
- Спиртли компресс ёрдамида қулоқни иситиш — бир неча қатлам букланган дока бўлагини илиқ спирт билан намлаб, уни қулоқ устига қўйиш ва устидан мато билан ўраб, бир неча соатга қолдириш мумкин.
Юқоридаги тавсиялар тез тиббий ёрдам ёки шифокор кўригига қадар қилиниши мумкин бўлган биринчи ёрдамдир. Уларнинг ҳеч қайси бири тўлиқ даволаниш курсининг ўрнини боса олмайди. Ҳар қандай бурун битиш ҳолатида отоларингологга ташриф буюришни унутманг. Жиддий асоратларнинг олдини олиш ўз зиммамиздадир.
Изоҳ (0)