Эрталабки таомга оқилона ёндашиш орқали кун давомида бардам ва тетик юра олиш имконимиз ошади. Тўғри танланган нонушта уйқучанлик ва апатияни йўқ қилади, соғлиқ ва кайфиятни яхшилаб, вазнни бир хил сақлашга ва кун давомида иштаҳанинг камайишига ёрдам беради. Аммо бугунги кунда нонушта қилмай ишга отланадиганлар сони ортиб бормоқда.
Хитойлик олимлар эрталаб соат тўққиздан кейин нонушта қилган одамларда депрессия аломатлари 28 фоизга кўпроқ учрашини аниқлади. Илмий тадқиқот натижалари The Journal of Affective Disorders (JAD) нашрида чоп этилди.
Сиан Тзяотун университетининг биринчи клиник касалхонаси тадқиқотчилари 11 йил давомида 24 мингга яқин ўрта ва катта ёшли инсонларнинг овқатланиш одатларини таҳлил қилди ва нонушта қилиш вақти уларнинг соғлиғида қандай ўзгаришларга олиб келишини кузатди. Улар иштирокчиларнинг эрталаб мунтазам равишда нонушта қилишганми ёки йўқми, шунингдек, куннинг биринчи таоми соат нечада қилингани каби маълумотларни тўплади.
Тадқиқот натижаларига кўра, эрталаб соат тўққиздан кейин нонушта қилган эркаклар ва аёлларда соат саккиздан аввал овқатланганларга қараганда кўпроқ ёмон кайфият ва руҳий саломатлик билан боғлиқ муаммолар кузатилган. Кеч нонушта қиладиганларнинг учдан икки қисмида депрессияга мойиллик ҳолатлари қайд этилган. Бундан ташқари, нонуштани бутунлай ўтказиб юбориш психологик ва руҳий саломатликка бирдек зарар кўрсатиши аниқланган.
Олимларнинг хулосасига кўра, кеч нонушта қилиш ёки уни умуман ўтказиб юбориш уйқусизлик, жисмоний фаолликнинг пасайиши ва ҳаттоки яшашга бўлган иштиёқнинг камайишига олиб келиши мумкин.
Изоҳ (0)