Хоразм вилояти Янгиариқ туманида ичкилик сабаб ота ўз ўғлини отиб ўлдирди, келини ва набирасига ҳам ўқ узди. Бу ҳақда ЎзА хабар берди.
Маълум қилинишича, ҳолат 19 февраль куни Янгиариқ туманининг “Янгиариқ” маҳалласида содир этилган. Ушбу маҳаллада яшовчи 1954 йилда туғилган шахс оилавий келишмовчилик сабабли 1974 йилда туғилган ўғлини уйида сақлаб келаётган ов қуроли билан қасддан отиб ўлдирган. Шунингдек, келини ва неварасига ҳам ўқ узиб, оғир жароҳат етказган.
Ушбу жиноят тергов-тезкор гуруҳ томонидан қисқа муддатда фош этилиб, гумонланувчи эҳтиёт чораси сифатида қамоққа олинган. Ҳозир дастлабки тергов ҳаракатлари олиб борилмоқда.
Вилоят ҳокими ушбу жиноятнинг келиб чиқишига сабаб бўлган омиллар дастлабки тергов ва суд органлари томонидан батафсил ўрганилиши, ўз навбатида жиноятларнинг олдини олишга масъул бўлган шахслар ҳамда қотиллик содир этилган маҳалла еттилиги фаолиятига ҳам танқидий нуқтайи назардан баҳо берилишини айтди.
Вилоят ички ишлар бошқармаси бошлиғи туманда оила, турмуш доирасидаги жиноят ва ҳуқуқбузарликларнинг барвақт олдини олиш, ов қуролига эга бўлган шахслар билан ҳуқуқий тушунтириш, назорат- текширув тадбирларини қатъий ўтказиб бориш бўйича масъулларга топшириқ ва кўрсатмалар берди.
Шунингдек, профилактик тадбирларни етарли даражада амалга оширмаган масъул ходимларнинг хатти-ҳаракатларига баҳо бериш мақсадида хизматга оид текширув тайинлангани маълум қилинди.
“Мазкур оила аъзолари билан кўп маротаба суҳбат ўтказганмиз. Маҳалламиз профилактика инспектори билан бирга бориб ов қуролини тўғри сақлаш борасида ҳам жуда кўп профилактик тушунтиришларни олиб бордик. Маҳалламиз учун жуда ёмон ҳолат бўлди бу ҳодиса.
Бу мудҳиш воқеанинг асл сабабчиси ичкиликдир. Спиртли ичимликни меъёридан ортиқ истеъмол қилган ота оила аъзолари билан келишолмай қолган. Ўртада жанжал чиқиб, мудҳиш қотиллик жинояти содир бўлган. Уч йилдан буён маҳалламизда бирорта жиноят содир этилмаган эди. Бундан кейин ҳам жиноят ва ҳуқуқбузарликларнинг олдини олиш бўйича маҳалла еттилиги, фаоллар билан биргаликда мунтазам ишлаймиз”, дейди маҳалла раиси Отабек Назарий.
Бундан аввал Андижонда 11 ёшли қизини калтаклаб ўлдирган эркак жазоланган эди. Шунингдек, Тошкентда тиланчилик учун ўзининг 10 ёшли ўғлидан фойдаланган эркак қамалганди. Бундан ташқари, Қашқадарёда эр-хотин уй олиш мақсадида бир ҳафталик чақалоғини 190 млн сўмга пуллагани ҳақида хабар берилганди.
Изоҳ (0)