“Арзанда жоним” қўшиғи билан мухлислар эътиборига тушган хонанда Сурайё Қосимова турмуш ўртоғи Ҳусан Қосимов билан “Иккаламиз” лойиҳасига берган интервьюсида тўйдан аввал қийин вазиятга тушишгани ва бир неча бор ажрашишга қарор қилишгани ҳақида гапиришди.
— Оила қурганимизга 17 йил бўлди. Инсон ичидан ўтганини ўзи билади. Кўп давраларда оила қурганимизга шунча йил бўлди, десак, наҳотки, деб ҳайратланишади. Ҳазиллашиб, иккимизнинг ичимиз тугаб бўлган, дейман. Чунки ўтган вақт мобайнида кўп марта синалдик.
Турмуш ўртоғим билан оила қуришим жуда қизиқ кечган. У киши Фарғонадаги санъат билим юртида ўқирди, мен эса Тошкентда ўқиб, у ерга тез-тез бориб турардим. Шу орқали мени таниганлар, аммо Тошкентга келиб, Ўзбекистон давлат Консерваториясига ўқишга кирганидан кейин танишганмиз. Биз шунчаки дўст эдик, ҳатто унга сенсираб гапирардим. Дўстларимнинг аксарияти ўғил болалар бўлгани учун Ҳусан ака билан ҳам шундай муносабатда бўламан дердим, дейди Сурайё Қосимова.
Ҳусан Қосимов эса тўйдан аввал аёли билан бирга ишлагани ва уларнинг оила қуришига кўпчилик қарши бўлгани ҳақида гапирди.
-XByToK_U.png)
— Тўйдан аввал аёлимнинг чолғучиси бўлганман, тўй хизматларига бирга борардик. Кейинчалик бир-биримизга нисбатан илиқлик пайдо бўлди. Аммо у баъзи учинчи шахс инсонларга ёқмади. Сурайё яхши продюсер билан ишларди, “Ҳусан билан оила қурса, шунча тиккан пулинг нима бўлади? У ҳаммасини ташлаб кетади”, деб у кишини фикридан қайтаришди. Катта пул иккимизнинг бўйнимизда қолди. У ҳам, мен ҳам оддий талабамиз, тўйлардан топадиган пулимиздан бошқа даромад манбайимиз йўқ эди. Телефонимиз жирингласа, юрагимиз дупилларди, қўрқардик. Вазият шу даражага етиб бордики, студияларда ухлаб қолишимизга тўғри келди. Бир-икки соат бўлса-да, тўртта стулни бирлаштириб, ухлаб олардик. Энг ёмони, ўша вақтда бизни энг яқин дўстларимиз, ҳамкорларимиз ёлғизлатиб қўйишди. Қарздан қутилгач, онамга Сурайё ҳақида айтдим. Қарши бўлдилар: у хонанда, кейин кўзи ожиз экан, дедилар. Хуллас, оиламиз тўйдан аввал ҳам кўп синовларни енгиб ўтди, дейди Ҳусан Қосимов.
Ҳусан Қосимов аёли билан оила қуришга жиддий қарор қилишдан аввал нималар ҳақида ўйлагани ҳақида ҳам тўхталиб ўтди.
— Оилада ҳеч бир нарса бир текис бўлмайди. Қийинчилик, етишмовчиликлар, синовлар бўлиши табиий. Биз оила қурмасдан аввал бир-биримизни тушуниб, қийин вазиятдан чиқолдикми, демак, оилавий ҳаётда ҳам қийналмаймиз, деб ўйлаганман. Ҳозир кўп оилалар кичик қийинчиликка ҳам чидолмай ажрашиб кетяпти. Эри қамалиб қолса, аёли ажрашиб, бошқа билан оила қуради. Ёки аёл бетоб бўлиб қолса, уни ота-онасининг уйига кетказиб, бошқасига уйланади. Оилада эр-хотиннинг дўст ва сабрли бўлиши муҳим аҳамиятга эга. Онам ҳам, Сурайёнинг яқинлари ҳам оила қуришимизга қарши бўлишганди. Аммо ҳозир ҳаммаси жойида, дейди Ҳусан Қосимов.
Сурайё Қосимова тўй кунини Озодбек Назарбеков белгилаб бергани ҳақида гапирди.
— Озодбек Назарбеков “Тўйингда бош бўламан”, деганида роса хурсанд бўлганман. Бунинг учун ҳамиша миннатдорман. Тўй ўтганидан кейин Собиржон Мўминов “Нега бизни ҳам айтмадингиз?” деганлар. Ҳақиқатан ҳам тўйга кўп санъаткорларни айтмагандик. Чунки Тошкентдан водийга бориш осонмас, унинг устига тўй хизматлари бўлади, ҳижолат бўлишмасин, дегандик. Ўшанда Собиржон Мўминов “Озодбек вилоят ҳокимлигининг энг яхши зиёфатини ташлаб, бугун синглимнинг тўйи, деб кетди”, деганида роса хурсанд бўлгандим, дейди Сурайё Қосимова.
Хонанда турмуш ўртоғига кўп марта ажрашиш таклифини бергани ҳақида гапирди.
— Кўп марта ажрашиш таклифини берганман. “Дўст бўлиб қоламиз”, деб қўшимча ҳам қилиб қўяман. Чунки аёллар барибир эмоцияга берилади. Турмуш ўртоғим ҳам сабрли, кўнглимни олади. Шу билан ҳаммаси унутилади, дейди Сурайё Қосимова.
Изоҳ (0)