“Надомат” лойиҳасининг навбатдаги суҳбатдоши айни дамда Оҳангарондаги 44-сонли манзил колониясида жазо муддатини ўтамоқда. Суҳбат давомида у қилган жиноятидан пушаймон эканлиги ҳақида гапирди.
Одилжон Ҳакимов 1974 йили Андижон вилоятида туғилган. У Жиноят кодексининг 104-моддаси билан айбдор деб топилиб, 10 йилга озодликдан маҳрум этилган. Маҳкум оилавий келишмовчилик сабаб 2021 йилнинг 26 октябрида турмуш ўртоғини пичоқлаган. Марҳума олган жароҳати сабаб касалхонада вафот этган.
— Аёлим билан муносабатимиз яхши бўлган. Турмушимиз давомида тўрт ўғил кўрдик. 2019 йили давлат билан шерикчилик асосида қишлоқда боғча ташкил қилдик. Марказдан анча йироқ бўлган Эшон қишлоғида 25 ўринли боғча очдик. Боғча фаолияти муваффақиятли бошланганидан руҳланиб, яна бирини очишга қарор қилдик. Аммо бу гал бир оз қарзга кирдик. Шундан кейин Россияга бориб ишлаб келишга зарурат туғилди. Ободонлаштириш бошқармасида ишлардим, аммо қарзлардан қутилиш учун аёлим билан келишиб 5-6 ойга Россияга кетадиган бўлдим.
Асли касбим ҳисобчи, аммо Россияда бирдан бундай яхши ишда ишлолмас экансиз. Қўлимдан устачилик келмагани учун аввалига бир оз қийналдим. Бир муддат ошпазлик қилдим, кейин қурилиш фирмасига ишга жойлашдим. Орада пандемия бошлангани учун ишлар тўхтаб қолди. Кейин омборхонага ишга жойлашдим. Яхши даромад топганимдан кейин кўпроқ пул жўнатдим, у онаси ва опаларининг номига ҳам боғчалар очди. Боғчалари сони 8 тага етганини эшитиб хурсанд бўлдим.
Орада ҳужжатлар билан боғлиқ муаммолар сабаб, бир ойда таътил олиб уйга келдим.
30 октябрь куни Россияга қайтиб кетишим керак эди. 26 октябрь куни эрталаб аёлим ишга кетди. У билан яхши кайфиятда хайрлашдим, болалар мактабга кетишганди. Совиткичда пиво ва ароқ бор эди. Ўзи кўп ичмайман, аммо ўша куни бир оз ҳордиқ чиқариш учун ичишга қарор қилдим. Меҳмонхонада ичиб ўтирганимда Россиядаги ҳамкасбларим интернет орқали алоқага чиқди. Улар билан гаплашиб ўтирганимда, аёлим бозорлик қилиб қайтган экан. У бир неча дақиқа эшикни тақиллатган, мен эшитмабман. Эшикни очсам, эрталабки кайфиятдаги аёлимдан асар ҳам қолмаган. У бозорлик қилиб келган экан, негадир тинимсиз ҳақорат қила бошлади. Ичимлик таъсиридами унинг гап-сўзлари жуда оғир ботди.
45 ёшда муҳожир бўлиб ишлаш осон эмас. Россияда осонлик билан пул топмаяпман, боримни сенга жўнатганман деган фикр хаёлимга келди. Уни тинчлантиришга ҳаракат қилдим. Аммо у рўзғорликни жойлаштириш давомида ҳам ҳақорат қилишдан тўхтамади. Энг ёмони ўзи кўрмаган ота-онамни ҳам ҳақорат қилди. Улар уйланмасимдан аввал ўлиб кетишган, уларни ҳақорат қилишга аёлимнинг ҳаққи йўқ эди.
У келмасидан аввал мева артиб, еб ўтиргандим. Ўзим билмаган ҳолда унга пичоқ урдим. Қон чиқаётганини кўриб, хушим ўзимга келди ва пичоқни ташлаб Тез ёрдамга қўнғироқ қилдим. Аммо Андижон вилоятига тушиб қолганимни билиб, гўшакни қўйиб, кўчага отилдим. Йўлак ёнида қўшни аёллар ўтирган экан. Уларга аёлимни пичоқлаб қўйганимни айтиб, ўзим “Тез ёрдам”ни олиб келиш учун рулга ўтирдим. Кўп ўтмай шифокорлар келиб, уни касалхонага олиб кетди. Аммо у билан касалхонага боролмадим, қўшнилар милицияга хабар бергани учун мени олиб кетишди. Сўроқ вақтида терговчига қўнғироқ қилиб аёлимнинг ўлими ҳақида хабар беришди.
Қилган ишимдан пушаймонман. Ичкилик сабабми ёки оиламга кўз тегдими, мудҳиш жиноятга қўл урдим. Тўрт фарзандим бир кунда ҳам отадан, ҳам онадан айрилди. Уларнинг ёнида ўзимни айбдор ҳисоблайман. Кун келиб мени тушунишлари ва кечиришларидан умидворман, — дейди маҳкум Одилжон Ҳакимов.
Видеони тўлиқ ҳолда YouTube’даги “Дарё медиа” каналида томоша қилишингиз мумкин.
Изоҳ (0)