Qashqadaryo viloyatida er-xotin uy olish maqsadida bir haftalik chaqalog‘ini 190 mln so‘mga pulladi. Bu haqda Oliy sud axborot xizmati “Daryo”ga xabar berdi.
Keltirilishicha, B.Q. o‘zining 2024-yilda tug‘ilgan X.G. ismli qizini sotish maqsadida, sharʼiy nikohida bo‘lgan ayoli bilan oldindan jinoiy til biriktirib, bir guruhda qiz farzandi borligini, o‘zlariga turar joy sotib olish uchun pul zarurligini, farzandini 190 million so‘mga sotishini aytgan.
5-mart kuni Qarshi tumani “Mirmiron” mahallasida joylashgan korxonadagi qorovulxonada 2024-yil 25-fevral kuni tug‘ilgan qizaloqni 190 million so‘mga sotib, shundan 45 million so‘m miqdoridagi pullarni olgan vaqtida, huquqni muhofaza qiluvchi organ xodimlari tomonidan o‘tkazilgan tezkor tadbirda ashyoviy dalillar bilan ushlangan.
28-iyun kuni jinoyat ishlari bo‘yicha Qarshi tuman sudi o‘z binosida, ochiq sud majlisida mazkur ish ko‘rib chiqildi. Sudda ular aybiga to‘liq iqrorlik bildirgan. Sud hukmiga ko‘ra, ota Jinoyat kodeksining 135-moddasi 3-qismining “a” bandida nazarda tutilgan jinoyatni sodir etganlikda aybli deb topildi va 5 yillik qamoq jazosi belgilandi. Onaga esa 4 (to‘rt) yil muddatga ozodlikni cheklash jazosi belgilandi.
Ushbu hukm hali qonuniy kuchga kirmadi.
Izoh (0)