Andijonda bufetdan so‘roqsiz yegulik olgan qizini kaltaklab o‘ldirgan erkak jazolandi. Bu haqda “Millar” dasturida xabar berildi.
Qotillik 2024-yilning oktyabrida viloyatning Marhamat tumanida sodir bo‘lgan. Erkak o‘zining 11 yoshli qizini qo‘l-oyog‘ini arqon bilan bog‘lab qo‘yib, avtomashina ehtiyot qismi bo‘lgan charm bilan ayovsiz do‘pposlagan. Qiz olgan tan jarohatlari sabab vafot etgan.
Voqea tafsilotlaridan ma’lum bo‘lishicha, 6-sinf o‘quvchisi bo‘lgan qiz maktab bufetidan so‘roqsiz yegulik olib yegan. Bu holat bir necha marotaba takrorlangani uchun maktab o‘qituvchisi qizning ustidan otasiga shikoyat qilgan. Buni eshitgan ota uni uyga olib kelib, jazolash maqsadida qora rezina kamar bilan ko‘p marotaba urib, qasddan og‘ir tan jarohati yetkazgan.
Holat yuzasidan sud ishi jinoyat ishlari bo‘yicha Andijon tumani sudida ko‘rib chiqildi. Sud hukmiga ko‘ra, sudlanuvchi ota Jinoyat kodeksining 104-moddasi 3-qismi “d” bandi (qasddan badanga og‘ir shikast yetkazish jabrlanuvchining o‘lishiga sabab bo‘lishi) bilan aybli deb topilib, unga nisbatan 9 yil muddatga ozodlikdan mahrum qilish jazosi tayinlandi.
2024-yil 14-noyabrda “Bolalarni zo‘ravonlikning barcha shakllaridan himoya qilish to‘g‘risida”gi qonun qabul qilingandi. Qonun 2025-yil 15-maydan kuchga kiradi. Unda bolalarni zo‘ravonlikning barcha shakllaridan himoya qilish bo‘yicha umumiy va individual chora-tadbirlar belgilab berilgan.
Izoh (0)