Болалар омбудсмани котибиятига Сурхондарё вилояти, Термиз шаҳрида истиқомат қилувчи фуқаро И.Қ. (эркак)нинг мурожаати келиб тушди. Бу ҳақда Болалар омбудсмани матбуот хизмати хабар берди.
Маълум қилинишича, И.Қ. ўз мурожаатида оилавий келишмовчиликлар сабабли турмуш ўртоғи Ф.Т. билан бирга яшамаётганини, ҳозирда турмуш ўртоғи томонидан вояга етмаган фарзанди З.Д.га (2009 йилда туғилган, қиз бола) нисбатан бир неча маротаба жисмоний зўравонлик қилинганини билдирган.
Аниқланишича, она аввал ҳам қизига тан жароҳати етказгани учун маъмурий жавобгарликка тортилган.
Ота бунга қарамай зўравонлик яна давом этаётганини билдириб, фарзандининг ҳуқуқларини ҳимоя қилишни ва турмуш ўртоғи Ф.Т.га нисбатан қонуний чора кўришни сўраган.
Мазкур ҳолат болалар омбудсмани сўрови асосида Сурхондарё вилояти прокуратураси томонидан ўрганилиб, Термиз шаҳар ИИБ томонидан ўтказилган терговга қадар текширув натижасида (суд тиббиёт экспертизаси хулосаси асосида) аёл вояга етмаган фарзандини уриб, тан жароҳати етказгани аниқланди.
19 декабрь куни аёлга Жиноят кодексининг 126-модда 1-банди (оилавий (маиший) зўравонлик) билан жиноят иши қўзғатилиб, ҳозирда дастлабки тергов ҳаракатлари олиб борилмоқда.
Болалар омбудсмани ҳолат юзасидан ўз кузатувини давом эттиради.
Аввалроқ Сирдарёда ўқитувчи 1-синф ўқувчисини қўлига игна санчиш билан жазолагани ҳақида хабарлар тарқалганди. Суриштирув давомида юқоридаги ҳолат тасдиғини топмаган. Сирдарёда икки ўқувчи қиз ўқитувчини ургани акс этган видео тарқалди. Ҳолат вилоят Мактабгача ва мактаб таълими бошқармаси ва соҳа масъуллари назоратига олинди.
Қашқадарёнинг Шаҳрисабз туманидаги мактабда ўқитувчи 5-синф ўқувчисини уриб жароҳатлади. Қарши шаҳридаги мактабда ўқитувчи ва ўқувчи ёқалашгани тасвирлари тарқалди. Алгебра фани ўқитувчиси ва 10-синф ўқувчиси бўлган икки қиз ўртасида ўзаро келишмовчилик келиб чиқиб, оғзаки тортишиб қолган. Уларнинг хатти-ҳаракатларига чора кўриш учун судга берилган.
Тошкентдаги мактабда аёл дастлабки иш кунида ўқувчини калтаклагани ҳам кенг муҳокамаларга сабаб бўлганди. Аёл жазоланиб, мактаб директори ишдан олинганди.
Изоҳ (0)