Ижтимоий тармоқларда ўзи билан яшашни хоҳламаган ўғлини калтаклаётган ота ҳақида видео тарқалган эди. Болалар омбудсмани ҳолат юзасидан маълумот берди.
Аниқланишича, 2024 йилнинг 23 март куни Э.Я. (Сурхондарё вилояти, Денов туманида туғилган, вояга етмаган) Тошкент шаҳар, Чилонзор туманида тоғасига тегишли қурилиш моллари дўконида бўлган вақтида отаси М.Х. (1981 йилда туғилган) келиб, Э.Я.ни ўзи билан олиб кетишини айтган. Э.Я. у билан кетишни хоҳламаслигини, отаси билан онасининг ўзаро жанжаллари сабаб улар билан бирга яшамаслигини маълум қилган. Отаси зўрлик ишлатиб олиб кетмоқчи бўлган.
Мазкур ҳолат бўйича туман ИИБ томонидан терговга қадар текширув ҳаракатлари ўтказилган. Ўрганиш давомида аниқланишича, бу оилада эр ва хотин ўртасида ўзаро келишмовчилик ҳолатлари мунтазам равишда кузатилгани сабабли жорий йилнинг 2 февраль куни Ўрта Чирчиқ тумани ИИБ томонидан М.Х. ни тазйиқ ҳаракатларини чеклаш мақсадида унинг турмуш ўртоғи С.М. га ҳимоя ордери берилган.
Ўтказилган терговга қадар текширув ҳаракатлари натижасига кўра, маъмурий иш қўзғатилиб, материаллар қонуний ҳал этилиши учун Жиноят ишлари бўйича Сурхондарё вилояти, Денов тумани судига юборилган.
2024 йилнинг 27 апрель куни М.Х. суд томонидан Маъмурий жавобгарлик тўғрисидаги кодекснинг 183-(майда безорилик) ва 185 (2)-моддалари (совуқ қуролни ёки совуқ қурол сифатида фойдаланилиши мумкин бўлган ашёларни олиб юриш) бўйича айбдор деб топилиб, унга 5 сутка қамоқ жазоси тайинланди.
Изоҳ (0)