Дубайда 247 минг доллар қарзга ботган ўзбекистонликка ёрдам берилди, деб хабар қилмоқда “Дунё” ахборот агентлиги.
Маълум қилинишича, Ўзбекистон Бош консулхонаси дипломатлари томонидан Бирлашган Араб Амирликларининг Дубай шаҳрида қийин молиявий аҳволда қолган ўзбекистонликка амалий ёрдам кўрсатилди. Бош консулхонадан олинган маълумотларга кўра, Дубайда қийин аҳволга тушиб қолган 1957 йилда туғилган Н.Ж. Ўзбекистонга қайтиши ва йиллар давомида тўпланиб қолган қарздорлигини бартараф этишда амалий ёрдам кўрсатишни сўраб мурожаат қилган.
У 1996 йилда Дубай шаҳрига мавсумий ишлаш мақсадида келган ва турли савдо расталарида ишлаган. 2001 йилдан 2025 йилга қадар турли сабабларга кўра амирликлар ҳудудида ноқонуний яшаб келган.
Биринчи навбатда Бош консулхона томонидан унга консуллик-ҳуқуқий ёрдам кўрсатилди ва вақтинча турар жой ва озиқ-овқат билан таъминланди. Суриштирувлар давомида унинг ноқонуний яшаб келаётган муддатида жами 901 минг 600 дирхам (247 минг 13 АҚШ доллари) қарзи тўпланиб қолгани ва ушбу маблағлар тўланмагунча БАА ҳудудини тарк эта олмаслиги маълум бўлди.
Бош консулхона ходимлари томонидан Бирлашган Араб Амирликларининг ҳуқуқни муҳофаза қилувчи ва тегишли органлари билан олиб борилган музокаралар натижасида Н.Ж.нинг барча қарзларидан воз кечиш ва юзага келган муаммоларни бартараф этиш бўйича келишувга эришилди.
Жорий йилнинг 15 февраль куни Бош консулхона дипломатлари ва "Аёллар ва болаларга ёрдам кўрсатиш маркази" хайрия ташкилоти кўмагида унга Дубай—Тошкент авиақатновига чипта олиб берилди ва Ўзбекистонга кузатиб қўйилди.
Хориждан Ўзбекистонга қайтарилаётган шахслар
2024 йил август—сентябрь ойларида хорижда ота-она қарамоғидан маҳрум бўлган 34 нафар бола Ўзбекистонга қайтарилганди. Октябрь ойида Россияда қаровсиз қолган 8 ойлик чақалоқ Ўзбекистонга, ота-онаси бағрига қайтарилди. Москвадаги вояга етмаган ҳуқуқбузарларни вақтинча сақлаш марказидан 4 нафар бола Ўзбекистонга олиб келинди.
Ўша ойда Туркияда ота-онасининг қаровисиз қолиб кетган уч нафар вояга етмаган бола Ўзбекистонга қайтарилди. Ноябрда Дубайни тарк этиш тақиқланган ўзбекистонлик болага ватанга қайтишига ёрдам берилди. Декабрда Россияда ота-она қарамоғисиз қолган 15 нафар бола Ўзбекистонга қайтарилди.
Шунингдек, Россиянинг Тива Республикаси Оқ Довурак шаҳрида вақтинча ишлаётган ва ҳужжатларини йўқотган тўрт нафар Ўзбекистон фуқароси ватанга қайтарилганди.
Изоҳ (0)