Қирғизистон Республикаси президенти Садир Жапаров “2025 йил 31 мартда Хўжанд шаҳрида имзоланган Қирғизистон, Тожикистон ва Ўзбекистон ўртасидаги уч давлат чегаралари туташган нуқта тўғрисидаги шартномани ратификация қилиш ҳақида”ги қонунни имзолади.
Қонун Қирғизистон Республикаси Жогорку Кенеши томонидан 2025 йил 25 июнда қабул қилинган.
Қонуннинг мақсади Қирғизистон Республикасининг “Қирғизистон Республикасининг халқаро шартномалари тўғрисида”ги ва “Қирғизистон Республикаси Жогорку Кенешининг Регламенти тўғрисида”ги қонунларига мувофиқ давлат ички тартиб-қоидаларини амалга оширишдан иборат.
Хусусан, қонун билан Қирғизистон Республикаси, Тожикистон Республикаси ва Ўзбекистон Республикаси ўртасида 2025 йил 31 мартда Хўжанд шаҳрида имзоланган уч давлат чегаралари туташган нуқта тўғрисидаги шартномани ратификация қилиш таклиф этилмоқда.
31 март куни Тожикистон, Қирғизистон ва Ўзбекистон президентлари Эмомали Раҳмон, Садир Жапаров ва Шавкат Мирзиёев Хўжандда (Тожикистон) бўлиб ўтган учрашувда давлат чегаралари туташган нуқта тўғрисидаги шартномани имзоладилар. Чегаралар туташган жой Фарғона водийсида жойлашган бўлиб, Сўғд (Тожикистон), Фарғона (Ўзбекистон) ва Боткен вилоятларини (Қирғизистон) бир-бирига туташтиради.
Изоҳ (0)