Атмосфера ҳавосини муҳофаза қилишга оид қонунчилик ижросини таъминлаш мақсадида Тошкент шаҳри ва Тошкент вилояти ҳудудидаги жами 762 та объект ўрганилди. Бу ҳақда Экология вазирлиги хабар берди.
Ўрганишда 103 та иссиқхона, 450 та ижтимоий соҳа объектлари ва 209 та саноат корхоналарининг айримлари томонидан атмосферага белгиланган меъёрлардан ортиқча тутун, чанг ва газ миқдори ташланаётганлиги аниқланди.
Жумладан, хатловдан ўтказилган иссиқхоналарнинг 70 таси ностандарт қозонхоналардан фойдаланаётганлиги, 83 таси давлат экологик экспертизасининг ижобий хулосаларини олмасдан фаолият юритаётганлиги ҳамда 24 тасида чанг-газ тозалаш ускуналари (филтрлар) ўрнатилмаганлиги маълум бўлди.
Ижтимоий соҳа объектларида тиббиёт чиқиндиларини ёқиш билан боғлиқ 18 та ва дудбуронлар тўлиб қолиши билан боғлиқ 5 та ҳолат аниқланди.
Шунингдек, хатловдан ўтказилган саноат объектларининг 40 таси давлат экологик экспертизасидан ўтказилмаганлиги, 108 тасида филтрлар мавжуд эмаслиги, 39 тасида эса ўрнатилган филтрларнинг самарадорлиги пастлиги ҳамда 29 тасида атмосфера ҳавосига ташламалар белгиланган меъёрдан ортиқча ташланаётганлиги аниқланди.
Аввалроқ Тошкент вилоятида иситишда резина шиналардан фойдаланган 8 та иссиқхона жаримага тортилган эди. Шунингдек, Тошкент вилоятида дудбурондан фойдаланиш қоидаларини бузган 103 та иссиқхона фаолияти тўхтатилгани айтилганди.
Газ ўғирлаётган иссиқхоналар
Изоҳ (0)