Ўзбекистонда ижро ҳужжатлари юзасидан қарздорлиги бор фуқароларга газ ёки ёқилғи қуйиш шохобчаларида хизмат кўрсатилмаётгани ҳақидаги хабарлар рад этилди. МИБ матбуот хизмати ҳолат юзасидан “Дарё”га изоҳ берди.
Мажбурий ижро бюросининг ахборот хизмати раҳбари Фаррух Тошпулатовнинг билдиришича, ижтимоий тармоқларда автомобилларга газ ёки ёқилғи қуйиш шохобчаларида фуқароларнинг судлар ёки бошқа органлар ҳужжатларига асосан мавжуд қарздорлиги сабабли, автотранспорт воситаларига хизмат кўрсатиш тақиқлангани ҳақидаги хабарлар асосга эга эмас.
“Фуқароларимизнинг ижро ишлари ҳақидаги қарздорлиги ҳақидаги хабарлар, аввало “SMS хабарномалар” орқали маълум қилиб борилади. Қолаверса, фуқароларимиз юзага келаётган қарздорликлар ҳақида маълумотларни олиш ва хорижга чиқиш олдидан тақиқ бор ёки йўқлигини мобил телефон орқали ҳам билиб бориш мумкин”, дейди МИБ ахборот хизмати раҳбари.
Чет элга чиқиш ниятида бўлган фуқаролар учун улар тақиқ ўрнатилган ёки ўрнатилмаганини текширишда ёрдам берадиган бот ҳам ишга туширилган. @mibuzbot Telegram-боти орқали тақиқ бор ёки йўқлигини билиб олса бўлади.
Изоҳ (0)